#Bizbirgemiz: Almatylyq áskerı qyzmetshiler maıdangerler men turmysy tómen otbasylarǵa kómektesti

ALMATY. QazAqparat – #Bizbirgemiz aktsııasyn Radıoelektronıka jáne baılanys áskerı-ınjenerlik ınstıtýtynyń ujymy jalǵady.Olar ekinshi dúnıejúzilik soǵys ardagerlerine, kópbalaly jáne az qamtylǵan otbasylarǵa azyq-túlik qoraptaryn taratty, dep habarlaıdy QazAqparat tilshisi.

Radıoelektronıka jáne baılanys áskerı-ınjenerlik ınstıtýtynyń bastyǵy general-maıor Asqar Mustabekov qaıyrymdylyq aktsııanyń mańyzdylyǵyn atap ótti.

«Áskerı qyzmetshiler «Biz birgemiz!» aktsııasy aıasynda áleýmettik jaǵynan osal januıalarǵa azyq-túlik pen birinshi kezektegi qajetti zattardy úlestirdi. Áskerı qyzmetshiler halyqpen birge jáne árqashan qoldaý kórsetedi», - deıdi Asqar Mustabekov.

Onyń aıtýynsha,aldymen muqtaj otbasylardyń tizimi jasalǵan. Tizimge 15 soǵys ardageri men birqatar jaǵdaıy tómen otbasylar engen.

«Áskerı qyzmetshilerge sheksiz alǵysymdy jetkizemin. Búgingi qıyn kezde dál osy kómekke muqtaj edik. Bizdi umytpaı, elep-eskerip júrgenderińe myń alǵys», - deıdi Almaty qalasynyń turǵyny, ardager Margarıta Plotnıkova.