Biz Uly Abaı ańsaǵan qoǵam qurýǵa qadam basyp kelemiz – Altaı Kólginov
«Búgin Memleket basshysy Qasym-Jomart Kemeluly Toqaevtyń «Abaı jáne XXI ǵasyrdaǵy Qazaqstan» atty kólemdi maqalasy jaryq kórip, qoǵam qyzý talqylap jatyr. Abaı fılosofııasy ýaqyt ótken saıyn ózektiligin joǵaltpaı, kerisinshe, jańa ǵasyrda da ult tárbıesiniń altyn qazyǵy bolatyny jaıly atalǵan maqalada jan-jaqty kórsetilgen. Qasym-Jomart Kemeluly maqalasynda bylaı dep jazady: «Qazir álem kún saıyn emes, saǵat saıyn ózgerýde. Barlyq salada jańa mindetter men tyń talaptar qoıylýda. Ǵylymdaǵy jańalyqtar adamdy alǵa jeteleıdi. Aqyl-oımen ǵana ozatyn kezeń keldi. Zaman kóshine ilesip, ilgeri jyljý úshin biz sananyń ashyqtyǵyn qamtamasyz etýimiz kerek. Bul qadam órkenıettiń ozyq tustaryn ulttyq múddemen úılestire bilýdi talap etedi. Mundaı kezde ózimizdiń taptaýryn, jadaǵaı ádetterimizden bas tartýymyz qajet. Abaıdyń keıbir qareketterge kóńili tolmaı, »Tereń oı, tereń ǵylym izdemeıdi, Ótirik pen ósekti júndeı sabap« dep únemi synı kózben qaraýynyń sebebi osynda», - dep jazady qala basshysy Facebook-te.
Onyń atap ótinshe, elordamyzda turǵyndardyń bilim alýyna, ǵylymmen tereń aınalysýyna, jumys isteýine, sportpen shuǵyldanýyna, jalpy ózin-ózi damytýǵa jaǵdaı jasalǵan. Adam ózin-ózi úzdiksiz damytýynyń basty kilti – ózin-ózi jeńe bilýi. Erinshektikti, jalqaýlyqty eńserip, eńbek etkende ǵana adam sergek júrmek.
«Biz qalaı desek te, Uly oıshyl ańsaǵan qoǵam qurýǵa qadam basyp kelemiz. Táýelsizdigimizdiń arqasynda óshkenimiz qaıta janyp, ult retinde sanamyz qaıta jańǵyryp jatyr. Bul – bizdi qýantady. «Birińdi qazaq, biriń dos, kórmeseń istiń bári bos» degen Abaı babamyzdyń birlikke shaqyrǵan sózin uran etip, árqaısymyz óz eńbegimizben aqyryn júrip anyq bassaq, eńbegimiz esh ýaqytta dalaǵa ketpes. Bıyl - Uly oıshyldyń 175 jyldyǵy. Qasym-Jomart Kemelulynyń qoldaýymen Bilim kúni Nur-Sultan qalasynda №87 qazaq orta mektebi ashyldy. Aıta ketý kerek, atalǵan mektepte Abaı mýzeıiniń de negizi qalandy. Memleket basshysynyń tapsyrmasyna sáıkes bıyl elordamyzda «Abaı álemi» ortalyǵy ashylady. Qazir ortalyqtyń orny anyqtaldy, qurylysy bastalady. «Abaı áleminiń» ult rýhanııatynyń damýyna zor úles qosary sózsiz», - dedi Altaı Kólginov.