Biz olıgarxtarmen emes, iri kásiporyndarmen jumys isteımiz - Jámishev

ASTANA. QazAqparat - Búgin Astanada ótken baspasóz máslıxatynda  Qazaqstannyń damý bankiniń basshysy Bolat Jámishev bir qıturqy suraqqa jaýap berdi, dep xabarlaıdy QazAqparat tilshisi.

"Bankten zaım alǵandar - iri kásipkerler. Olar Forbes-tiń tizimine kiredi. Osynyń ózi Qazaqstannyń damý bankiniń olıgarxtardyń múddesine jumys istep jatqanyn kórsetpeı me?" - dep surady bir jýrnalıst. Oǵan Bolat Bıdaxmetuly: "Shyny kerek, bul - urymtal suraq. Bizdi olıgarxtarmen emes, Qazaqstannyń iri kásiporyndarymen jumys jasaıdy dep aıtqan durys shyǵar. Endi, jaǵdaı solaı boldy. Máselen, tústi metallýrgııa salasynda tórt-aq kásiporyn bar. Sol kásiporyndardyń sońǵy benefıtsıary - tanymal adamdar. Sol sııaqty xımııa ónerkásibinde de tórt-aq kompanııa jumys isteıdi. Bireýi - reseıdiki, qalǵan úsheýi ózimizdiki, olardyń da benefıtsıary - tanymal adamdar. Osy oraıda bir suraq týyndaıdy. Qazaqstannyń damý banki xımııa salasyn qarjylandyrýy qajet pe? Iá! Ekonomıkany ártaraptandyrý máselesin kóterip jatsaq, shıkizattyq emes sektordy damytamyz desek, xımııa ónerkásibin qarjylandyrmaý qısynsyz dep oılaımyn. Oǵan qosa, osy salaǵa qajetti shıkizatymyzdyń mol ekenin eskerý kerek. Iá, biz iri jobalardy qarjylandyramyz. Degenmen, ol arqyly el ekonomıkasyn qoldap otyrǵanymyzdy umytpaý qajet", - dep jaýap berdi.

Onyń aıtýynsha, búginde "Báıterek" xoldınginiń quramyna kiretin Qazaqstannyń damý banki iri jobalardy qarjylandyrsa, "Damý" qory shaǵyn jáne orta bıznesti qarjylandyrýymen aınalysady.

Aıta keteıik, búgingi baspasóz máslıxatynda Bolat Jámishev devalvatsııaǵa qatysty óz boljamyn jarııalady .  Sondaı-aq Qyzylorda qalasyndaǵy shyny zaýytynyń qurylysy jaıynda aıtyp berdi.