Biz mıllıondaǵan jańa jumys oryndaryn quramyz - QR Prezıdenti
«Saılaý sharalary aıaqtaldy. Endi naqty jumystardyń kezegi keldi. Biz atqaratyn jumystarymyzdy bilemiz. Saılaý aldyndaǵy kompanııa barysynda men usynǵan reformalardy túsindirý júrgizildi. Qazaqstannyń ındýstrııalandyrýyn aıaǵyna deıin jetkizip, ekinshi ekonomıkany qurýymyz kerek, tabystyń jańa sapasymen jáne adamdardyń biliktiligimen mıllıondaǵan jańa jumys oryndaryn qurýymyz qajet. Bul birinshiden», - dedi Elbasy.
Munymen qosa Prezıdent «Nurly jol» baǵdarlamasyn júzege asyryp, barsha Qazaqstan boıynsha joldar jelisin salyp, sapaly avtokólik jáne temir joldardy, elektr jelilerin iske qosý qajettigin atap ótti. Osy arqyly elimizdiń ekonomıkalyq baılanystaryn taǵy jandandyryp, Qazaqstandy tranzıttik memleketke aınaldyrý jumystary atqarylady.
«Men bes jańa ınstıtýtsıonaldyq reformalardy usyndym. Osynyń negizinde bıznes damyp, bıznestiń erkindigi qamtamasyz etiledi. Bıznes qoldaýǵa ıe bolýy tıis, eshkim de jeke menshikke kúdik uıalatpaýy tıis»,- dedi Elbasy.
Memleket basshysy bul jańa kezeń ekenin, aldaǵy kúrdeli jumystardy barsha halyq birge eńserýi tıis ekenin atap ótti.
Forým barysynda N.Nazarbaev qazaqstandyqtarǵa jańa maqsattardy iske asyrýda tabystar tiledi.
«Biz elimizde birlikti ustanamyz. Biz Qazaqstannyń aınalasyndaǵy jáne barsha álemdegi odaqtastarymyz ben seriktesterimizdiń aldynda ózimizdiń mindetterimizge berik bolamyz. Ózimizde beıbitshilikti nyǵaıtamyz, elimiz ben barsha álemdegi beıbitshilikke yqpal etemiz», - dedi Prezıdent.