Biz memlekettik basqarý salasyna arnalǵan trenıngter jobasyn jasadyq - Erlan Ábil

NUR-SULTAN. QazAqparat - Memlekettik basqarý salasyna arnalǵan baǵdarlamalardyń trenerleri - otandyq jáne sheteldik jetekshi sarapshylar. Bul týraly QR Prezıdenti janyndaǵy Memlekettik basqarý akademııasynyń rektory Erlan Ábil aıtty, dep habarlaıdy QazAqparat tilshisi.

Aıta keteıik, búgin Ortalyq kommýnıkatsııalar qyzmetinde Prezıdenttik jastar kadr rezervine irikteý qorytyndysy jarııalandy.

«Ózińdi úzdiksiz damytyp otyrý - jetistikke jetý men eńbekke qabiletti bolýdyń kepili bolady. Qatysýshylarda ózderiniń damý deńgeıin kórý múmkindigi boldy. Ár rezervshi kezeń saıyn qandaı nátıje kórsetkeni týraly esep alyp otyrdy, bul qurǵan jospardyń damýynyń negizi bola alady», - deıdi Erlan Ábil.

Onyń aıtýynsha, kadr rezervindegi kandıdattar QR Prezıdenti janyndaǵy Memlekettik basqarý akademııasy jáne basqa da uıymdarda biliktilikterin arttyra alady.

«Biz memlekettik basqarý salasyna arnalǵan »Oılaý dızaıny«, »Emotsıonaldy ıntellekt«, »Strategmıalyq menedjment«, »Jobalyq menedjment«, »Bıznes protsesterdi júzege asyrý« jáne taǵy da basqa trenıngter jobasyn jasadyq. Bul týraly Akademııanyń saıtynan kórýge bolady. Bul baǵdarlamalardyń trenerleri - otandyq jáne sheteldik jetekshi sarapshylar. Olardyń kásibı deńgeıleri joǵary. Rezervtegiler osy trenıngterdiń birin tańdap, kásibı biliktiligin arttyratyn bolady», - deıdi ol.

Fınalǵa 13 myńnan astam adam ótinim berip, 330-y iriktelgen. Ulttyq komıssııa otyrysynyń qorytyndysy boıynsha 300 úmitker Prezıdenttik jastar kadr rezervine alyndy.