Biz kókpardyń «kenjesimiz» - Amerıkalyq kovboı

ASTANA. QazAqparat - Astanadaǵy «Qazanat» ıppodromynda búgin amerıkalyq kovboılar baspasóz máslıhatyn ótkizdi. Qurlyq asyp kelgen meımandar Elordada jýyq arada bastalatyn álemdik kókpar oıynyna arnaıy kelip otyr, dep habarlaıdy «QazAqparat» HAA tilshisi.

«Qazanattaǵy» kovboılardyń jıynyna Sport jáne dene shynyqtyrý komıtetiniń tóraǵasy Elsııar Qanaǵatov, QR Ulttyq sport túrleri qaýymdastyǵynyń prezıdenti Bekbolat Tileýhan, Qazaqstandaǵy AQSh-tyń Tótenshe jáne Ókiletti elshisiniń orynbasary Djon Mark pen amerıkalyq kovboı komandasyn bastap kelgen Krıd Garnık keldi.

«Qaıyrly kún qurmetti hanymdar men myrzalar!» dep sózin qazaqsha bastaǵan Djon Mark chempıonatty uıymdastyryp otyrǵan Qazaqstan tarapyna alǵysyn bildirdi.
 

«Mundaı chempıonattyń myń jyl buryn jylqyny qolǵa úıretken Aqmola óńirinde bolyp jatqany qýantady. Men qazaqtar úshin de, kovboılar úshin de jylqynyń orny bólek ekenin bilemin. Kovboılar úlken daıyndyqpen keldi. Men jylqyǵa degen qurmet AQSh pen Qazaqstandy jaqyndastyra túsetinine senimdimin. Amerıkalyq komanda aldaǵy kúnderi ózderiniń at ústindegi sheberlikterin kórsetedi. Sondyqtan bárine aq jol tileımin!», - dedi Djon Mark.
 

QR Ulttyq sport túrleri qaýymdastyǵynyń prezıdenti Bekbolat Tileýhan kókpar oıyndaryna jalpy jıyny 18 mıllıon teńge tigilip otyrǵanyn aıtty. Qaýymdastyq basshysy AQSh elshiligine shynaıy rızashylyǵyn bildirip, eki eldiń qarym-qatynasy týraly sóz qozǵady. Onyń aıtýynsha, Qazaqstan kókpar chempıonatyn ótkizýge tas-túıin daıyn.
 

«Kókpar oıyndary bes kún boıy úzdiksiz ótkiziledi. Aqtyq saıys 27 tamyzda ótedi. AQSh-ta kókpardan jarys ótip jatqanyn kórdik. Amerıka kókparǵa kirisip jatsa, kókpardyń baǵy janatynyna kúmánimiz joq. Kókpar kórshi elderdiń birazyna ortaq ulttyq oıyn. Qazaqta on balasy bar atanyń balalarynyń biri «mynaý meniń ǵana ákem» degen balany «aqymaq bala» dep aıtady. Bir atanyń balalary úıdiń otaǵasyn «bárimizdiń ákemiz» dep biledi. Sol sekildi, sizder on birinshi bala bolyp kelip jatsańyzdar, qosh keldińizder dep aıtamyz», - dedi Bekbolat Tileýhan.
 

Bul sózge kovboılar komandasynyń kapıtany Krıd Garnık alǵysyn bildirdi.

«Eń kishi uly - kenjesi retinde otbasyǵa qabyldaǵandaryńyzǵa rahmet! Kenje retinde qatarǵa qosqan úlken aǵalarymyz bizge qoldaý bildiredi degen senimdemin. Jylqyǵa degen qurmetpen qaraıtyn elge kelgenimizge qýanyshtymyz. Menimen birge at ústinde júrgen kil myqtylar keldi. Dıplomatııalyq turǵyda emes, sporttyq jáne mádenı turǵyda baılanysty keńeıtkimiz keledi», - dedi Krıd Garnık.