Biz kelissózder protsesin ilgeriletýge arnalǵan kez kelgen áreketti qoldaımyz – Senat tóraǵasy

ALMATY. QazAqparat – QR Parlamenti Senatynyń Tóraǵasy Máýlen Áshimbaev TMD elderi Parlamentaralyq Assambleıasy Keńesiniń otyrysynda bıyl Qazaqstannyń osy uıymǵa tóraǵalyq etip otyrǵanyn atap ótti, dep habarlaıdy QazAqparat tilshisi.

Senat Tóraǵasynyń aıtýynsha, Qazaqstan tóraǵalyq kezeńinde pandemııadan keıin qaıta qalypqa kelý, tsıfrlyq tehnologııany engizý, azyq-túlik qaýipsizdigi, mádenı-gýmanıtarlyq jáne bilim berý salasyndaǵy yntymaqtastyqty arttyrý máselelerine basymdyq berildi. Sondaı-aq spıker qorshaǵan ortany qorǵaý, «jasyl» tehnologııany engizý, tabıǵatty tıimdi paıdalaný máseleleri de basym baǵyttardyń biri ekenin atap ótti.

Óz sózinde Senat tóraǵasy TMD PAA-nyń mereıtoılyq otyrysy álemde buryn-sońdy bolmaǵan geosaıası jaǵdaıdyń shıelenisken tusynda ótip jatqanyn aıtty.

«Bizdiń elimiz qaýipsizdiktiń bólinbeıtindigi jáne halyqaralyq quqyq pen BUU Jarǵysynyń qaǵıdattary negizinde halyqaralyq problemalardy beıbit jolmen sheshýden basqa balama joq ekendigi týraly ustanymdy quptaıdy. Osyǵan oraı biz kelissózder protsesin ilgeriletýge arnalǵan kez kelgen áreketti qoldaımyz», – dedi Máýlen Áshimbaev.