Biz Qazaqstanda týyp, qut qonǵan osy elde turyp jatqanymyzdy maqtan tutamyz!- Qyzylorda oblystyq nemis ulttyq-mádenı ortalyǵynyń jetekshisi Irına Shek
- Astanada «Senim. Dástúr. Ashyqtyq. Tózimdilik» degen taqyryppen ótken Assambleıanyń kezekti sessııasynyń barysynda Elbasy, Qazaqstan halqy Assambleıasynyń Tóraǵasy Nursultan Nazarbaev aldymyzǵa birqatar jańa mindetterdi qoıdy. Bıyl qurylǵanyna 15 jyl tolǵan Assambleıanyń jıynynda Memleket basshysynyń jasaǵan baıandamasy bárimizdiń kóńilimizden shyǵyp qana qoıǵan joq, sonymen birge ol keleshekte biz atqaratyn jumystardyń baǵyttaryn aıqyndap berdi. Osy oraıda Qazaqstan nemisteri qoǵamdyq birlestigi qaýymdastyǵynyń tóraǵasy Aleksandr Dedererdiń sózine toqtalǵym keledi. Sebebi, Assambleıada onyń aıtqan oılary Qazaqstanda turatyn kúlli nemis dıasporasynyń ortaq oıyn jetkizgen tujyrym boldy. A. Dederer óz sózinde Qazaqstanda qurylyp, jumys jasap jatqan Assambleıanyń qyzmeti álem elderiniń qyzyǵýshylyǵyn týdyryp otyrǵanyn aıta kele, búginde barsha qazaqstandyqtardyń memlekettik tildi úırenetin ýaqyty jetkenin basa aıtty. Sonymen qatar keler jyly qazaqstandyqtar úshin mereıli mereke - Táýelsizdigimizdiń 20 jyldyq mereıtoıy kele jatqanyn, ol aıtýly oqıǵany laıyqty atap ótý úshin arnaıy is- sharalar josparyn jasap, daıyndyqty osy bastan bastaýymyz kerektigine toqtaldy.
Assambleıada qozǵalǵan taqyryptardyń biri - tózimdilik. Osy tusta mynany basa aıtqym keledi: tózimdilik elimizdiń jastary ortadan asqan azamattarynyń qanyna sińgen qasıet. Jastarǵa úlgi-ónege kórsetý úshin, biz boıymyzdaǵy bul qasıetti keleshekte de joǵaltpaýymyz kerek, al jas urpaqty tózimdilikke tárbıeleýdi mektep jasynan bastaǵan durys.
Elbasymyz atap kórsetkenindeı, kelisim men birliktiń qandaı da bir etnosqa qatystylyǵyna qaramastan, ony árbir qazaqstandyqtyń saqtaǵany abzal. Óıtkeni, bizdiń ortaq Otanymyz - Qazaqstannyń myzǵymaı turýy osy kelisim men birlikke tyǵyz baılanysty. Biz TMD elderiniń birqatarynda bolyp jatqan etnosaralyq alaýyzdyqtardyń ózimizde qaıtalanbaýyn qalaımyz. Bizdi kórshimiz - Qyrǵyzstandaǵy jaǵdaı alańdatady. Onyń arǵy jaǵyndaǵy tájik jerinde ara-tura burq etip qalatyn qarsylyq aktsııalary tún uıqymyzdy shaıdaı ashady. Osy rette aldaǵy jeltoqsan aıynyń 1-2-si kúnderi elordamyz Astana ótetin EQYU Sammıtiniń qorytyndylarynan kóp jaqsy jańalyq kútemiz.
Assambleıanyń bul sessııasynda qazaqstandyq patrıotızm jaıly kóp aıtyldy. Elbasy aıtqandaı, shynaıy patrıotızm daýys kótere sóılegen sózderden emes, naqty ister men jaýapty qımyl-áreketterden kórinýi kerek. Biz bul tujyrymdy quptaımyz. Bizdiń kóp ultty elimizdiń damý keleshegi patrıotızm arqyly jasalýy tıis. Osy oraıda Assambleıa músheleri búginge deıin jetken jetistikterimizdiń jaqsy nasıhatshysy bola bilýi tıis.
Biz Assambleıanyń sessııasynda aldymyzǵa qoıylǵan barlyq mindetter oryndalýy tıis dep esepteımiz. Sonyń ishinde «memlekettik tildi bilý árbir Qazaqstan azamatynyń boryshy» degen qaǵıdamen óz basym kelisemin. Jasyratyny joq, elimizdiń basqa aımaqtaryna qaraǵanda Qyzylorda oblysynyń jaǵdaıynda qazaq tilin úırený birshama jeńilirek. Olaı bolatyny, bul aımaqtaǵy jergilikti halyqtyń úles-salmaǵy ejelden kóp. Men ózim Qaraǵandy oblysynda týyp-óskenmin. Kenshiler qalasynda oqyp júrgenimde ózimniń bolashaq ómirlik serigim - Qyzylordanyń týmasymen tanystym. Ulty koreı ol týǵan jeriniń naǵyz patrıoty bolyp shyqty. Sol sebepti, oqý bitirgen soń Qaraǵandyda qalýǵa múmkindigi bola tursa da, ol jerde aıaldamaı, janyna meni ertip, Syr eline tartty.
Búginde meniń qyzylordalyq atanǵanyma da jıyrma jyldyń júzi bolyp qalypty. Osynda dúnıe esigin ashqan qyzdarym nemis, orys tilderimen qatar memlekettik til - qazaq tilin de jaqsy biledi. Olardyń jergilikti, memleket quraýshy ulttyń tilin bilip ósýlerine jastaılarynan ózimiz baǵyt siltedik. Balalardyń ózderi de osyǵan beıim boldy. Meniń ózim de saıraı jónelmegenimmen, memlekettik tildi túsinip qana qoımaı, keıbir oılarymdy jetkize alamyn. Biz, koreı-nemis ulttarynan quralǵan Shek otbasynyń músheleri Qazaqstanda týyp, qut qonǵan osy elde turyp, osy jerde ósip-ónip jatqanymyzdy maqtan tutamyz!