Biz qaı ýaqytta da birgemiz – oraldyq volonter

ORAL. QazAqparat – Qala kúnine oraı Oralda «Úzdik volonter – 2020» sharasy ótip, úzdikter marapattaldy, dep habarlaıdy QazAqparat tilshisi.

Jyl boıy qoǵamdyq sharalarǵa belsene qatysyp, sondaı-aq tótenshe jaǵdaı kezinde halyqqa qoldaý kórsetip, óz úlesin qosqan jastarǵa qurmet kórsetildi.

Qala ákimi Abat Shynybekovtiń atap ótkenindeı, eriktiler óz ómiri men densaýlyqtaryna tóngen qaýipke qaramastan, birneshe aı boıy muqtaj jandarǵa qolushyn sozdy.

Aýqymdy jumystardy volonterlerdiń kómeginsiz atqarý múmkin emes edi.

Sharada aıtylǵanyndaı, shaharda 104 volonterlik uıym qatarynda 2 myńǵa jýyq erikti bar.

Tótenshe jaǵdaı kezinde volonterlik shtab qurylyp, 109 baılanys nómiri jáne áleýmettik jeliler arqyly turǵyndardan túrli baǵytta ótinim jınalyp, kómek berilip keledi. Atap aıtqanda, volonterlerdiń qatysýymen 5 myńnan astam otbasyna azyq-túlik, dári-dármek jáne basqa járdem kórsetildi. Sonymen qatar volonterlerdiń kómegimen jınalǵan qarajat esebinen 583 otbasyna azyq-túlik, 278 otbasyna dári-dármek jetkizildi. Tótenshe jaǵdaı kezinde jáne karantın ýaqytynda 168 otbasyna 42500 teńge áleýmettik járdemaqyǵa ótinim berý, 667 otbasyna aýyz sý aparý boıynsha kómek berildi.

Qala boıynsha tek volonterlerdiń kúshimen 130 myń maska (15 myńy qoldan tigilse, 115 myńy demeýshiler arqyly) tegin taratyldy.

Quqyq qorǵaý organdary qyzmetkerlerimen birge qoǵamdyq qaýipsizdikti qamtamasyz etý maqsatynda 100-ge jýyq reıd jasaldy. Oralda volonterlerdiń baqylaýymen sanıtarlyq-epıdemıologııalyq talaptardy buzýdyń 68 deregi anyqtalyp, tıisti organdarǵa joldandy.

«Qazaq halqynda «Kóp túkirse, kól» degen sóz bar. Meniń volonterlikke kelýimniń sebebi eldegi tótenshe jaǵdaı kezinde qala turǵyndaryna az da bolsa septigimdi tıgizbek nıet edi. Osyndaı kezde «Memleket maǵan ne beredi emes, men memleketke, elge ne bere alamyn» degen azamattar jınalyp, Oral qalasyndaǵy «20 okrýg» degen volonterlik qozǵalystyń qurylýyna uıytqy boldyq. Otbasylaryna azyq-túlik sebetterin jetkizip, tegin dári-dármek, medıtsınalyq maska tarattyq. Qazirgi tańda komandamyzben birge múmkindigi shekteýli jandar men kópbalaly otbasylardyń úılerin taza aýyz sýmen qamtý isimen aınalysyp jatyrmyz. Bul marapat – jalǵyz meniń emes, barsha komandanyń jeńisi men eńbeginiń jemisi dep bilemiz. Aldaǵy ýaqytta da barlyq turǵyndarǵa bosańsýǵa bolmaıtynyn, sanıtarlyq talaptardy barynsha saqtaý kerektigin eske salǵym keledi. Biz mindetti túrde bul indetti jeńemiz, óıtkeni birgemiz», dedi sharaǵa qatysqan volonter, jeke kásipker Áset Sultanuly.

Eske sala keteıik, budan buryn BQO-da karantın talaptaryn buzǵan 33 adamǵa 1,3 mln teńge aıyppul salynǵanyn, sondaı-aq qus tumaýynyń aldyn alý sharalary júrgizilip jatqanyn jazǵan bolatynbyz.