Biz IYU-ǵa múshe elderdiń azyq-túlik qaýipsizdigin qamtamasyz etýge múmkindik beretin júıe qurýymyz qajet - A.Mamytbekov

ASTANA. QazAqparat - Biz Islam yntymaqtastyǵy uıymyna múshe elderdiń azyq-túlik qaýipsizdigin qamtamasyz etýge múmkindik beretin júıe qurýymyz qajet. Bul týraly búgin Azyq-túlik qaýipsizdigi jáne aýyl sharýashylyǵyn damytý jónindegi Islam yntymaqtastyǵy uıymy mınıstrleri konferentsııasynyń 7-shi sessııasynda QR Aýyl sharýashylyǵy mınıstri Asyljan Mamytbekov málim etti.

«Búgingi kúni azyq-túlik qaýipsizdigi máselesi mynadaı sebepterge baılanysty asa ózekti bolyp otyr: halyq sanynyń ósetindigi boljanǵan, al bul álemde azyq-túlik tapshylyǵynyń aıtarlyqtaı ósýine keledi. Álemde halyq sanynyń ósýi jónindegi boljamdy eskere otyryp, 2050 jylǵa qaraı azyq-túlikti qazirgi deńgeıden 60-70 paıyzǵa, al damýshy elderde qazirgi kólemnen eki esege artyq óndirý qajet bolady», - dedi mınıstr.
Bul rette A.Mamytbekov halyq ósiminiń eń joǵary úlesi damýshy elderge, onyń ishinde Islam yntymaqtastyǵy uıymyna múshe elderge tıesili bolatyndyǵyn atap ótip, aýyl sharýashylyǵy óndirisi kólemin ulǵaıtý úshin tıisti rezervterdiń joqtyǵyna toqtaldy.
«Sarapshylardyń baǵalaýy boıynsha egistikke jaramdy jerlerdiń qoljetimdi qoryn adamzat áldeqashan paıdalanyp taýysqan. Osyǵan baılanysty, biz Islam yntymaqtastyǵy uıymyna múshe elderdiń azyq-túlik qaýipsizdigin qamtamasyz etýge múmkindik beretin júıe qurýymyz qajet. Azyq-túlik qaýipsizdigi jónindegi Islam uıymyn qurý - osy máseledegi bolashaq kooperatsııanyń irgetasy. Bul bizdiń Prezıdentimizdiń bastamasy jáne onyń maqsaty Islam Yntymaqtastyǵy Uıymyna múshe elderdi azyq-túlikpen qamtamasyz etý jónindegi kóptegen máselelerdi sheshý bolyp otyr», - dedi ol.