Biz bıylǵy talapkerlerge óńirlik ýnıversıtetterge túsýge keńes beremiz – vıtse-mınıstr

ASTANA. QazAqparat – 2023 jylǵy negizgi UBT qorytyndysyn jarııalaǵan Ǵylym jáne joǵary bilim vıtse-mınıstri Qýanysh Erǵalıev bıylǵy talapkerlerge óńirlik ýnıversıtetterge túsýge keńes berdi, dep habarlaıdy QazAqparat tilshisi.

«Jalpy, bıylǵy ózgeristerdiń basym bóligi óńirlik JOO-lardy qoldaý maqsatynda júzege asyrylyp jatyr. Elimiz boıynsha stýdentterdiń 1/3 bóligi Almatyda oqıdy, sebebi 35 JOO osy qalada. Bul óz kezeginde jataqhana jetispeýshiligine alyp kelýde. Sondyqtan biz bıylǵy talapkerlerge óńirlik ýnıversıtetterge túsýge keńes beremiz: sapa jaǵynan esh kem túspeıdi, jataqhana máselesi de joq», - dedi ol.

Sonymen qatar, vıtse-mınıstr óńirlerde sheteldik joǵary oqý oryndarynyń fılıaldary ashylyp jatqanyn eske saldy.

«Mysaly Arızona ýnıversıtetiniń fılıaly M.Qozybaev atyndaǵy Soltústik Qazaqstan ýnıversıtetiniń bazasynda, al Heriot-Watt ýnıversıtetiniń fılıaly Aqtóbedegi Q.Jubanov atyndaǵy ýnıversıtetiniń bazasynda ashylyp jatyr», - dedi Qýanysh Erǵalıev.