«Biz birtutas, bólinbeıtin birlikti kórsettik» - respýblıkalyq basylymdarǵa sholý
***
Keshe Aqordada Elbasy Nursultan Nazarbaev Qazaqstan Respýblıkasy Prezıdentiniń kezekten tys saılaýynyń aıaqtalýyna baılanysty otandyq jáne sheteldik baspasóz quraldarynyń ókilderine arnap baspasóz máslıhatyn ótkizdi. Osyǵan oraı «Egemen Qazaqstan» gazetinde «Biz birtutas, bólinbeıtin birlikti kórsettik» degen taqyryppen kólemdi maqala jarııalandy. Tilshilerdiń barlyq saýaldaryna tuşymdy jaýap bergen Memleket basshysy: «Kez kelgen Prezıdentti, sonyń ishinde úlken tabystarǵa qol jetkizip otyrǵan Prezıdenttiń janynda árqashanda syn da júredi. Bul qalyptaǵy jaǵdaı, sondyqtan men olardyń synyna baıyptylyqpen qaraımyn. Ádil synnan qorytyndy shyǵaryp, olardy qabyldaı alamyn. Óz tarapymnan men oppozıtsııaǵa: bılikke talasqannan góri, eldiń jaqsy turmysqa jetýine atsalyssańyzdar durys bolar edi degen usynys aıtar edim», - dep atap kórsetti.
Osy basylymda Qytaı Halyq Respýblıkasynyń tóraǵasy Hý Tszıntaonyń Nursultan Nazarbaevty Qazaqstan Respýblıkasy Prezıdenti qyzmetine qaıta saılanýyna baılanysty quttyqtaýy jaryq kórdi. «Siz, Joǵary mártebeli, memleket tizginin qolǵa alǵan ýaqyttan beri elde qoǵamdyq turaqtylyq pen ekonomıkanyń joǵary ósý serpini saqtalyp keledi, halyqtyń ál-aýqaty udaıy artýda, Qazaqstannyń halyqaralyq jaǵdaıy anaǵurlym nyǵaıýda. Sizdiń basshylyǵyńyzben Qazaqstan halqy memleketti eńselentý men damytý isinde jańa, anaǵurlym mańyzdy tabystarǵa qol jetkizetinine senemin», - degen quttyqtaýynda QHR Tóraǵasy.
***
«Aıqyn» gazetiniń jazýynsha, keshe Astanadaǵy «Qazaqstan» sport kesheninde ótken, «Elbasy birge, alǵa!» dep atalǵan forýmǵa elimizdiń barlyq óńirlerinen 5 000-nan astam qatysýshy jıyldy. Jeńis forýmynda Memleket basshysy jurtshylyq aldyna shyǵyp, sóz sóıledi. «Ortalyq saılaý komıssııasy ashyq, naǵyz ádil bolǵan saılaýdyń nátıjesinde barsha Qazaqstan saılaýshylarynyń 95 paıyzdan astamy meni qoldap daýys bergendigin málimdedi. Biz jeńdik! Bul jeńis - bárimizdiń jeńisimiz, qazaq halqynyń jeńisi, qazaqstandyqtardyń jeńisi! Qazaqstan, qazaq halqy, óziniń bolashaǵyn anyqtap, el ishindegi birlikti saqtaıtyn, búkil dúnıejúzine beıbitshil el ekenin taǵy da kórsetti», - dedi Elbasy. Maqalanyń tolyq nusqasy «Ashyq, naǵyz ádil saılaý boldy» degen taqyryptan oqı alasyzdar.
Oral qalasynda kúres túrleri boıynsha Qazaqstan Respýblıkasy Spartakıadasy aıasynda ótken el chempıonaty óz máresine jetti. Osyǵan oraı «Aıqyn» gazetinde «Jarys jalaýy jelbireıdi» degen taqyryppen maqala basyldy. Basylymnyń atap ótýinshe, apta sońynda áıelder jáne grek-rım kúresi ókilderi jarys kórigin qyzdyrdy. Bul tartys jankúıer qaýymdy beı-jaı qaldyrǵan joq. «Óıtkeni Qazaqstan chempıonatynda baq synaýǵa bel býǵandar arasynda Olımpıada oıyndary men álem chempıonattarynda júlde alǵan saqa sportshylarmen qatar, jastar dýynda dara talantymen oqshaýlanyp júrgen saıypqyrandar boldy», - dep jazady basylym. Tolyǵyraq gazettiń búgingi nómirinen bile alasyzdar.
***
«Ataqty abaıtanýshy ǵalym Qaıym Muhamethanulyna arnap ornatylǵan eskertkish taqtaǵa daq tústi. Qaskóıler mármár tastyń ortasynan áldebir ótkir zatpen tilip, qaıta jóndeýge kelmesteı etken», dep jazady «Alash aınasy» gazeti búgingi nómirindegi «Abaıtanýshyny qorlaǵan qaskóı kim?» degen maqalada. Basylymnyń atap ótýinshe, Qaıym atanyń 90 jyldyǵyna oraı Semeıdegi turǵan úıiniń qabyrǵasyna eskertkish taqtany ózi uzaq jyldar eńbek etken bilim ordasy SMPI arnaıy ornatqan. Ǵalymnyń qurmetine qoıylǵan bul taqtany buldirýge qandaı júrekjutqan jannyń barǵany, tipti osy bir taǵylyq áreketti qandaı maqsatta jasaǵany ázirshe jumbaq.
«Qazaqstan halqy óz bolashaǵyna qatysty basty tańdaýyn jasady. Sáýirdiń 3-i kúni tańǵy saǵat 7-den bastap esigin ashqan elimizdegi barlyq saılaý ýchaskelerine aǵylǵan saılaý quqyǵyna ıe azamattar eldiń endigi Prezıdentin anyqtaý úshin daýys berip, azamattyq ustanymdaryn aıǵaqtady. Ortalyq saılaý komıssııasynyń sáýirdiń 4-i kúni erteńgi saǵat 10.00-de jarııalaǵan aldyn ala qorytyndylary boıynsha qazirgi Prezıdent Nursultan Nazarbaevqa saılaýshylardyń 95,5 paıyzy daýys bergen»», - dep jazady «Alash aınasy» gazeti. Basylymnyń búgingi nómirinde saılaýǵa qatysty barlyq jaıttar, sheteldik baıqaýshylardyń pikirleri toptastyrylyp berilgen jarııalanym «Qazaqstan halqy óz tańdaýyn jasady» degen taqyryppen berilgen.
***
«Kazahstanskaıa pravda» gazetinde Reseı Federatsııasynyń Prezıdenti Dmıtrıı Medvedevtiń Nursultan Nazarbaevty Qazaqstan Respýblıkasy Prezıdenti qyzmetine qaıta saılanýyna baılanysty quttyqtaýy jarııalandy. Onda: «Saılaýdaǵy bultartpaıtyn jeńisińiz Sizdiń óz halqyńyzdyń shynaıy kóshbasshysy retindegi laıyqty abyroıyńyzdy tııanaqtaı túsedi. Dostas Qazaqstannyń keıingi jyldarda áleýmettik-ekonomıkalyq salada, memlekettik qurylysta, halyqaralyq arenada qol jetkizgen eleýli tabystary Sizge jalpyulttyq qoldaý men senimdi qamtamasyz etti», - delingen.