Biz birgemiz: Jetisaılyq sharýalar 74 tonna jemshópti Mańǵystaýǵa jóneltti

TÚRKІSTAN. QazAqparat - Túrkistan oblysynan Mańǵystaýǵa 70 tonnadan astam mal azyǵy jóneltildi, dep habarlaıdy QazAqparat óńirlik kommýnıkatsııalar qyzmetine silteme jasap.

Qazaq halqynyń izgi qasıetteriniń biri qaıyrymdylyq ekeni daýsyz. Kez kelgen qıyndyqty el bolyp jeńe bilgen.

Mańǵystaý oblysynda bıyl jaýyn-shashyn az túsýine baılanysty mal azyǵy shóptiń jetkilikti mólsherde shyqpaı qalýyna baılanysty qýańshylyq boldy.

Osyǵan oraı elimizdiń ár óńiri múmkindiginshe kómek kórsetip otyr.

Máselen, Túrkistan oblysy Jetisaı aýdanynyń sharýalary «Biz birgemiz» aktsııasy aıasynda 74 tonna press shópti mańǵystaýlyqtarǵa jóneltti.

Sondaı-aq, jetisaılyqtar taǵy da qosymsha 60 tonna mal azyǵyn jóneltpek.

Aıta keterligi, byltyr ǵana topan sýdan zardap shekken Maqtaaral aýdany Órgebas aýylynyń sharýalary da bir vagon jemshóp tıep, qıyndyq kórip jatqan sharýalarǵa jiberdi.