Biz birgemiz: Nur-Sultanda 5 myńnan astam muqtaj otbasy kómek alady

NUR-SULTAN. QazAqparat - «Jas Otan» jastar qanatynyń belsendileri Nur-Sultan qalasy ákimdigimen jáne volonterlermen birlesip, karantın kezinde muqtaj otbasylarǵa áleýmettik mańyz bar azyq-túlikpen gıgıenalyq paketter taratýda, dep habarlaıdy QazAqparat tilshisi.

«Elbasy, «Nur Otan» partııasynyń tóraǵasy Nursultan Nazarbaev «Biz birgemiz» aktsııasyn jarııalaǵanyn bilesizder. «Nur Otan» partııasynyń aktsııasy aıasynda qarajat bólindi jáne biz ómirlik qıyn jaǵdaıǵa tap bolǵan az qamtylǵan, kópbalaly otbasylarǵa, qart adamdarǵa kómektesemiz. Nur-Sultan qalasynda - 5 myń, Almatyda - 7 myńnan astam otbasyn qamtımyz. Áleýmettik paket ázirleımiz. Sonymen qatar gıgıenalyq paketter de taratamyz. Oǵan maska, antıseptık, dymqyl jáne qurǵaq maılyq, kir sabyn jáne ıis sabyn kiredi. Aktsııaǵa volonterler jumyldyrylǵan. Olar bizge kómektesip jatyr», - dedi «Jas Otan» jastar qanatynyń atqarýshy hatshysy Janat Shúkeev.

Onyń naqtylaýynsha, áleýmettik kómek kórsetiletin azamattardyń tizimi ákimdikten alynady. Sodan keıin jastar uıymdarynyń músheleri men eriktiler azyq-túlik pen gıgıenalyq jıyntyqty muqtaj otbasylarǵa taratady.

«Nur-Sultan qalasynda jalpy 400 erikti jumyldyrylyp otyr. Bul aktsııa 19 naýryz kúni bastaldy. Osy kúnderdiń ishinde 1 300 otbasyn qamtydyq. Josparymyzda elorda boıynsha 5 myńnan astam otbasyn qamtý bar. Búgin 500 otbasyǵa kómek taratýdy josparlap otyrmyz», - dedi ol.

Aktsııa sáýir aıyna deıin jalǵaspaq.

«19 naýryzdan «Magnum» saýda úıinen qoıma aldyq jáne osy jerde azyq-túlik pen sharýashylyq taýarlaryn jınaqtaımyz. Qoldaýdy qajet etetin jalǵyz basty qarttar, kóp balaly otbasylar bar. Biz kún saıyn shamamen 500 qorap jınaqtap, muqtaj otbasylarǵa taratamyz. Mundaı jıyntyqty elordanyń 4 aýdanynda taratamyz. Ár aýdanda 125 otbasydan bar», - dedi «Jas Otan» jastar qanaty elorda fılıalynyń tóraǵasy Baqdáýlet Jandildaev.