Biz birgemiz: 11 myń otbasy kómek aldy

ALMATY. QazAqparat – «Nur Otan» partııasy Tóraǵasynyń birinshi orynbasary Baýyrjan Baıbek «Biz birgemiz!» aktsııasy aıasynda qansha adamǵa kómek kórsetilgenin aıtty, dep habarlaıdy QazAqparat tilshisi.

«Memleket basshysynyń bastamasymen qolǵa alynǵan «Biz birgemiz!» respýblıkalyq aktsııasy aıasynda Elbasynyń tapsyrmasy boıynsha «Nur Otan» partııasy men Tuńǵysh Prezıdent Qory koronavırýs kezeńinde halyqtyń áleýmettik álsiz toptaryna qoldaý kórsetý úshin qarajat bóldi. Tek sońǵy 6 kúnde búkil el kóleminde 11 600-den astam otbasyǵa 214 mln. teńgege kómek kórsetildi»,– dep jazdy Baýyrjan Baıbek Facebook-tegi paraqshasynda .

Sonymen qatar, ol «Jas Otan» volonterlary men belsendi nurotandyqtarǵa alǵysyn bildirdi.

«Jalǵyz basty qarttarǵa, turmysy tómen kópbalaly otbasylarǵa, erekshe qajettilikteri bar azamattar men basqa da muqtaj jandarǵa áleýmettik paketterdi baılanyssyz úlestirip berýge erikti túrde atsalysyp júrgen «Jas Otan» volonterlary men belsendi nurotandyqtarǵa alǵys aıtamyn»,– dedi ol.

⠀