Biz Aýǵanstanda turaqtylyq pen beıbitshiliktiń ornyqqanyn qalaımyz - Q.Toqaev
Senat Tóraǵasy Aýǵanstan Islam Respýblıkasynyń Volısı Djırga Assambleıasy delegatsııasynyń basshysy Mohammad Saleh Seldjýkımen kezdesti. Q.Toqaev Qazaqstan men Aýǵanstan yntymaqtastyǵynyń qarqyndy damýyna qanaǵattanǵandyq bildirdi.
Parlament joǵarǵy Palatasynyń basshysy Qazaqstan Aýǵanstannyń qajetti ekonomıkalyq jáne gýmanıtarlyq kómek kórsetip kele jatqany, sondaı-aq áleýmettik ınfraqurylym qurylysyna járdem berilgeni týraly atap ótti. «Biz Aýǵanstanda turaqtylyq pen beıbitshiliktiń ornyqqanyn qalaımyz», - dedi Q.Toqaev. M.Seljýkı qarjylaı jáne gýmanıtarlyq kómek berilgeni úshin Qazaqstan Prezıdenti men Qazaqstan halqyna alǵys aıtty jáne aýǵan stýdentteri úshin bizdiń elimizdiń bilim berý baǵdarlamasy jalǵasa beretinine senim bildirdi. Halyqaralyq saladaǵy kún tártibin talqylaı kelip, júzdesýshiler Aýǵanstan tóńiregindegi oqıǵalarǵa oraı alańdaýshylyq bildirdi. «Biz Aýǵanstan aınalasyndaǵy jaǵdaıdy muqııat qadaǵalap otyrmyz. UQShU qyzmetinde Ortalyq Azııadaǵy qaýipsizdik basym baǵyt», - dedi Q.Toqaev. Parlamentaralyq baılanystarǵa qatysty Senat Tóraǵasy qazirgi jaǵdaıda parlamenttik dıplomatııanyń zor ról atqaratyny jáne Qazaqstannyń Aýǵanstan Parlamentimen yntymaqtastyqty údetýge múddeli ekenin aıtty. Ujymdyq qaýipsizdik sharty uıymy Parlamenttik Assambleıasy Keńesiniń otyrysy barysynda depýtattar UQShU Keńesi jeltoqsan sessııasynyń sheshimderin jáne Uıymnyń jaýapty aımaǵyndaǵy jaǵdaıdy talqylady, UQShU-ǵa 2015 jyly Tájikstan Respýblıkasynyń tóraǵalyq etýindegi basymdyqtarymen tanysty, UQShU PA qysqy sessııasynyń nátıjelerin jáne UQShU aıasyndaǵy parlamenttik yntymaqtastyqtyń ózge de máselelerin qarady. Keńes otyrysynda jáne TMD PAA jalpy otyrystarynda qatysýshy memleketter parlamentteriniń basshylary jıyrmadan astam ózekti máselelerdi talqylady. Mereıli mereke - Jeńistiń 70 jyldyǵyna «Otan qorǵaý jolynda qaza bolǵandardy este qaldyrý týraly» jáne «Patrıottyq tárbıe týraly» eki úlgi zań ázirlendi. Sondaı-aq, kún tártibine «Kontreılerlik tasymaldaý týraly», «Aýdıtorlyq qyzmet týraly», «Memlekettik sektor uıymdaryndaǵy ishki aýdıt týraly», «Eriktilik (volonterlik) týraly» sekildi mańyzdy úlgi zańdar, «Týrıstik qyzmet týraly» úlgi zańnyń jańa mátini, TMD-ǵa qatysýshy memleketterdiń tehnologııalyq terrorshyldyqqa qarsy is-qımyl salasyndaǵy zańnamasyn jetildirý jónindegi usynystary engizildi. Parlament Senatynyń depýtattary UQShU Parlamenttik Assambleıasynyń qorǵanys jáne qaýipsizdik; áleýmettik-ekonomıkalyq jáne quqyqtyq máseleler jónindegi turaqty komıssııalarynyń jáne TMD PAA-nyń áleýmettik saıasat jáne adam quqyqtary; saıası máseleler jáne halyqaralyq yntymaqtastyq; ǵylym jáne bilim jónindegi turaqty komıssııalarynyń otyrystaryna qatysty.