Biz almaǵan áli 5 joldama bar - Ǵalymbek Kenjebaev Bokstan Ulttyq quramanyń bas bapkeri

NUR-SULTAN. QazAqparat – Bokstan Ulttyq quramanyń bas bapkeri Ǵalymbek Kenjebaev Iordanııanyń Amman qalasynda ótip jatqan bokstan Olımpıadaǵa irikteý týrnıri týraly qysqasha pikirimen bólisti, dep habarlaıdy QazAqparat tilshisi.

«Ózderińiz bilesizder, sońǵy ózgeristerge baılanysty Olımpıadaǵa burynǵydaı 10 salmaqta emes, 8 salmaqta baramyz. Dál qazirgi kórsetkish boıynsha biz 8 lıtsenzııanyń úsheýine ıelik ettik. Alda áli 5 joldama bar. Sondyqtan, 3 lıtsenzııaǵa bola qýanýǵa áli erte. Jospar boıynsha bul Azııalyq irikteý týrnırinen keminde 6 Olımpıada joldamasyn alyp qaıtýdy maqsat etkenbiz. Jalpy, «aryq aıtyp semiz shyqqandy» jaqsy kóremiz ǵoı. Maqsat oryndaldy dep aıta almaımyz. Jarys aıaqtalǵan joq, áli de joldamadan úmittimiz», - dedi bas bapker QazAqparat tilshisine áleýmettik jeli arqyly jaýap berip.

Esterińizge sala keteıik, qazaq boksshylary búgin Tokıo Olımpıadasyna úsh joldama jeńip aldy. 69 keli salmaqta Abylaıhan Júsipov , 81 keli salmaqta Bekzat Nurdáýletov , 91 keli salmaqta Vasılıı Levıt atalmysh týrnırde qarsylasyn jeńdi.