Bıylǵy jyly Balqashta 10 myń sharshy metrden astam turǵyn úı paıdalanýǵa beriledi

QARAǴANDY. QazAqparat - QR Premer-Mınıstri Asqar Mamın Qaraǵandy oblysyna jumys sapary kezinde «Nurly jol» jáne «Nurly jer» memlekettik baǵdarlamalaryn júzege asyrý barysyn tekserdi. Úkimet basshysy Qaraǵandy-Balqash avtojolyn qaıta jańartýdyń úsh iri ýchaskesinde bolyp, Balqashtaǵy jańa turǵyn úı qurylysynyń barysyn kórdi, dep habarlaıdy QazAqparat tilshisi.

Bıylǵy jyly qalada halyqtyń áleýmettik osal toptary sanaty boıynsha kezekte turǵandar úshin eki turǵyn úı qurylysy bastaldy. Sondaı-aq taǵy 6 turǵyn úı salý josparlanǵan.

Ótken jyly 5 497 sharshy metr turǵyn úı salyndy. 2020-shy jyly 10 800 sharshy metr turǵyn úı paıdalanýǵa beriledi dep josparlanýda. Sońǵy jyldary turǵyn úı negizinen «Nurly jer» baǵdarlamasy sheńberinde bıýdjet qarajaty esebinen salyndy. Qarqyn joǵary bolýy múmkin, biraq kommertsııalyq jáne jeke turǵyn úı qurylysyn jylýmen jabdyqtaý qýatynyń jetispeýi kedergi keltirýde.

Osy maqsatta «Injenerlik-kommýnıkatsııalyq ınfraqurylym qurylysy» jobasy ázirlenip, iske asyrylýda, ol energııa, jylý jáne sýmen jabdyqtaý, atap aıtqanda, «Samal» yqshamaýdanyndaǵy problemalardy sheshe otyryp, turǵyn úı qurylysyn «jandandyrýǵa» múmkindik beredi.

Sondaı-aq, Balqash JEO-dan «Qońyrat» yqshamaýdanyna deıin jylý berý qubyrynyń qurylysy da erekshe nazar aýdarýdy talap etedi. Jergilikti bılik 2022 jylǵa qaraı jylý problemasyn tolyq sheshýge ýáde berip otyr.

Úkimet basshysy sondaı-aq Kazakhmys Smelting JShS Balqash mys balqytý zaýytynda boldy. Onda Premer-Mınıstrge óndiristik úderis jáne kásiporyndy odan ári damytý jónindegi josparlar tanystyryldy.