Bıylǵy jyl ziltemirshilerimiz úshin erekshe tabysty boldy - Aýyr atletıka federatsııasynyń bas hatshysy M. Tápsir
Soǵan oraı, QazAqparat tilshisi aýyr atletshilerimizdiń bıylǵy jyldy qalaı qorytyndylap, kelesi jyly qandaı bıikterdi baǵyndyrýdy josparlap otyrǵandaryn bilý maqsatynda QR aýyr atletıkadan Qazaqstan ulttyq qurama komandasynyń basshysy Meńdihan Tápsirmen suhbattasqan edi.
- Meńdihan Tápsiruly, 2009 jyl da aıaqtalyp qaldy, árbir uıym, kásiporyndar jyldyq qorytyndylaryn jasaýda. Bizdiń de suraǵymyz osy tóńirekte. 2009 jyly Aýyr atletıka Federatsııasy qandaı qorytyndy jasady? Sizder úshin bıylǵy jyl qandaı jyl boldy, aýyr atletshiler qandaı jetistikterge jetti?
- Bıylǵy jyl aýyr atletshiler úshin ótken jylǵydaı tabysty da, jemisti jyl boldy. 2008 jyly bizdiń aýyr atletter kótergen shyńyn, jetken bıigin bıylǵy jyly da saqtaı bildi. Ózderińiz biletindeı, 2008 jylǵy Olımpıadada Qazaqstan qurama komandasy 1 altyn, 2 kúmis, 1 qola medal alyp, álemdik aýyr atletıkada 3 orynǵa taban tiregen bolatyn. Birinshi orynda Qytaı, ekinshi orynda Koreıa, úshinshi orynda Qazaqstan boldy. Álemdik chempıonatta Qazaqstan bir satyǵa kóterilip, álem boıynsha 2-shi satyǵa kóterildi. Bıylǵy jyly bizdiń tilmen aıtqanda eki úlken start boldy. Onyń birinshisi aýyr atletıkadan Taldyqorǵanda ótken Azııa chempıonaty. Ol jarysqa álemniń 27 elinen sportshylar qatysyp, Qazaqstan ol jarystan komandalyq esep boıynsha 1-shi orynǵa shyqty. Onda bizdiń qazaqstandyq aýyr atletshiler 4 altyn, 3 qola medalge ıe boldy. Jekeleı komandalyq esep boıynsha, qyzdar arasynda komandamyz birinshi oryn, erler arasynda komandamyz 3-shi oryndy ıelendi. Birinshi oryndy 95 keli salmaq boıynsha, Vladımır Sedov utyp alsa, 105 keli salmaq boıynsha Sergeı Istomın ekeýi altyn medal aldy. Al qyzdar arasynda Svetlana Podobedova men Tatıana Hromova altyn medal alǵan bolatyn. Kúmis medaldy asa aýyr salmaqta ıAkov Verh aldy. Al Almas Óteshov kúmis medaldiń ıegeri atandy. Osy chempıonatta 63 keli aýyr salmaq boıynsha Maıa Maneza qorjynǵa qola medal saldy. Osy jetistikterdiń nátıjesinde 4 altyn, 3 qola medalmen komandalyq esepte ekinshi orynǵa ıe boldyq. Azııa chempıonatynan keıin Álem chempıonatyna daıyndyqtarymyzdy bastap, jattyǵý jumystarymyzdy, qarqynymyzdy kúsheıtip, daıyndaldyq. Osy aralyqtarda óz elimizde, sonymen qatar Túrkııada da jarysqa qatystyq.
- Bıylǵy jyly Álem chempıonatynda óte jaqsy nátıjelerge qol jetkizdińizder
- Iá, ózderińiz biletindeı, qarasha aıynyń 20-y men 30-y aralyqtarynda Ońtústik Koreıada ótken Álem chempıonatynda bizdiń aýyr atletterimiz óner kórsetti. Bizdiń elden 9 atlet - Almaty oblysynan Zúlfııa Chınshanlo (58 kg), Maıa Maneza (63 kg), Svetlana Podobedova ( 75 kg) men Vladımır Sedov (94 kg), Aqmola men Shyǵys Qazaqstan oblystarynan Tatıana Kostenko ( 63 kg), Igor Vashanov (105 kg) jáne Tatıana Hromova (75 kg), Vladımır Kýznetsov ( 77 kg), Qostanaı oblysynan Svetlana Cheremshanova ( 53 kg) qatysty. Bul jarystan bizdiń aýyr atletterimiz 4 altyn, 1 qola medalmen oraldy. Tórt altyn medal ıegerleri - Maıa Maneza, Zúlfııa Chınshanlo, Vladımır Sedov jáne Svetlana Podobedova - absolıýtti álem chempıony atanyp, álem rekordyn jasady. Al Vladımır Kýznetsov qola medal aldy. Osyǵan deıin Qazaqstannyń birde-bir ulttyq quramasy olımpıadalyq sport túrlerinen álem chempıonattarynda bundaı kólemde altyn medalǵa qol jetkizgen joq. Sondyqtan, bizdiń aýyr atletshilerimizdiń bul jeńisi óte úlken jetistik bolyp tabylady dep esepteımin. Qazaqstandyq aýyr atletıka tarıhynda bul birinshi ret bolǵan úlken jetistik. Buǵan deıin mundaı kórsetkishti Qytaı eli kórsetken bolatyn. Qazaqstan ekinshi bolyp rekord jańartyp otyr. Elbasy bul jeńisimizge óte úlken baǵa berip, bizdiń sportshylarymyzǵa arnaıy quttyqtaý hat joldady. El Prezıdentiniń quttyqtaýynda aıtylǵandaı, «Bul - qazaqstandyq komandanyń sporttyń olımpıadalyq túrleri boıynsha álemdik deńgeıdegi jarystardaǵy tamasha jeńisi». Ol jeńisimizdi biz Otandyq sportty damytýǵa qosqan úlesimiz dep sanaımyz. Taǵy da bir atap aıta ketetin jetistigimiz, sol jarysta 129 kelini baǵyndyrǵyn 16 jasar Chınshanlonyń esimi álemdegi eń jas álem chempıony retinde Gınnestiń rekordtar kitabyna endi. Oǵan deıin rekord kórsetken jas atlet retinde 17 jasynda Ilıa Ilın rekordttar kitabyna engen bolatyn. 16 jasar Chınshanlo men Manezany qarapaıym jurt bile bermeıtin, al qazir qos qyzdy búkil qazaq dalasy ǵana emes, álem jurty tanydy. Sonymen qatar, atap ótpese bolmaıtyn, bizdiń Svetlana Podobedova degen qyzymyz 4 ret álemdik rekordty jańartty. Odan keıin Vladımır Sedov ta Ilıa Ilınniń salmaǵy boıynsha chempıon atandy. Sondaı-aq qola medaldiń ıegeri atanǵan semeılik Vladımır Kýznetsovtyń da jetistigi úlken dep sanaımyz. Kishkentaı qyzymyz Zúlfııa eki-úsh jyl buryn Qytaı elinen kóship kelgen bolatyn. Ol osy jyly mamyr aıynda Taılandta ótken jasóspirimder arasyndaǵy dodada 58 keli salmaqta qola júlde ıelengen edi. Osyndaı jetistikterimizben komandamyz álem boıynsha 2-shi orynǵa kóterildi. Mundaı jetistik buryn aýyr atletıka tarıhynda bolmaǵan. Al Qytaıdyń áıelder quramasy komandalyq esep boıynsha birinshi ret jeńilis kórip otyr. Mundaı jeńilis olarda buryn sońdy bolmaǵan. Bıyl álem birinshiligi 20-shy ret ótse, Qytaıdyń áıelder quramasy komandalyq eseppen 19 jyl qatarynan jeńimpaz bolǵan edi.
- Kelesi jyly aýyr atletshilerimiz qandaı jarystarǵa qatysýdy josparlaýda? Komandaǵa qandaı úmit artasyz?
- Endi biz 2010 jyly bolatyn, jazǵy Azııa oıyndaryna qatysamyz. Odan keıin 2012 jyly London qalasynda ótetin jazǵy Olımpıada oıyndaryna qatysamyz dep josparlap otyrmyz. Kelesi, 2010 jyly bizdiń josparymyzda 3 jarys bar. Birinshisi Túrkııada ótetin álem chempıonaty. Ekinshi jarys Qytaı elinde ótedi. Úshinshisi tuńǵysh ret 17 jasqa deıingi jasóspirimder arasynda ótetin Olımpıada oıyndary. Bul olımpıadaǵa qatysý úshin bizdiń Qazaqstan qurama komandasy jasóspirimder arasynda ótken lıtsenzııalyq álem chempıonatyna qatysyp, barlyq 4 lıtsenzııany utyp aldy. Jalpy birinshilikke qatysý úshin ár memleketke 4 lıtsenzııadan beredi, onyń ekeýi uldar, ekeýi qyzdar arasyndaǵy jarysqa. Biz sonyń tórteýin de utyp aldyq. Sıngapýrde ótetin bul olımpıada oıyndaryna bizdiń 4 atletimiz qatysady. Olardan biz úlken nátıje kútemiz. Odan basqa túrli týrnırler, álem kýbogy kezeńderi, Azııa chempıonattary bolady. Olarǵa da qatysamyz. Biraq negizgi degen 3 jarys aldyńǵy aıtqandarym. Bularǵa daıyndyqty álden-aq bastap kettik. Bizdiń komanda jas komanda bolyp esepteledi. Orta jasy 22 jasta. Sol sebepti bizdiń atletterimizdiń bolashaǵy zor. Áli de kóptegen jetistikterin kórsetip, álemdik bıikterdi baǵyndyrady degen senimdemin. Ony bıylǵy jyly kórsetip otyrǵan nátıjelerinen-aq baıqaýǵa bolady, dep oılaımyn. Qazaqstan quramasy aýyr atletıkadan tek álemdik orynǵa shyqty. Aýyr atletıka buryn boks, kúres, velosport jáne taǵy da basqa sport túrlerinen keıingi orynda bolsa, sońǵy jyldary bárin basyp ozyp, aldyńǵy orynǵa shyqty. Ótken jyly da birinshi orynda bolatyn, bıyl sol ornyn saqtap qaldy. Bunyń ózi de úlken jetistik.
- Áńgimeńizge rahmet! Elimizdiń baıraǵyn asqaqtata berýlerińizge tilektespiz!