Bıylǵy jarty jylda Ulttyq qordyń ınvestıtsııalyq tabysy 400,9 mlrd teńge boldy

ASTANA. QazAqparat - 2018 jylǵy birinshi jartyjyldyqta Ulttyq qordyń ınvestıtsııalyq kirisi teńgemen qaıta baǵalaýdy eskere otyryp, 400,9 mlrd teńgeni qurady, dep habarlaıdy QazAqparat Ulttyq banktiń baspasóz qyzmetine silteme jasap.

Jekelegen BAQ-ta Qazaqstan Ulttyq qorynyń 2018 jylǵy ınvestıtsııalyq shyǵyny 785 mlrd teńgeni quraǵany týraly aqparat paıda bolǵan edi. Ulttyq bank osyǵan baılanysty túsinik berdi.

«Buǵan deıin túsindirgendeı, shyn máninde 785 mlrd teńge Ulttyq qordyń is júzindegi ınvestıtsııalyq shyǵyny bolyp tabylmaıdy. Bul san baǵamdyq aıyrmany eskere otyryp, bıylǵy 1-toqsannyń sońyndaǵy ınvestıtsııalyq nátıjeni kórsetedi. Aqparattyń bastapqy kózi - Qarjy mınıstrligi jarııalaıtyn QR Ulttyq qorynyń túsimderi men paıdalanylýy týraly esep. Bul esep ulttyq valıýtada jasalǵan jáne onda QR Ulttyq qorynyń kiristiligi esepteletin bazalyq valıýtadaǵy (AQSh dollary) aktıvterdi basqarýdan ınvestıtsııalyq kiris týraly aqparat joq» delingen habarlamada.

2018 jylǵy 31 naýryzdaǵy jaǵdaı boıynsha, 785 mlrd teńge shyǵyn 67 mlrd teńge mólsherindegi is júzindegi ınvestıtsııalyq kiristen  jáne teńgemen qaıta baǵalaý boıynsha 852 mlrd teńge bolatyn teris aıyrmadan turatynyn atap ótti banktiń baspasóz qyzmeti.

«Ol osy kezeńde teńgeniń AQSh dollaryna qatysty baǵamynyń nyǵaıýyna baılanysty. Osylaısha, 2018 jylǵy 31 naýryzdaǵy jáne 2017 jylǵy 31 jeltoqsandaǵy jaǵdaı boıynsha AQSh dollarynyń baǵamy tıisinshe 318.31 teńge jáne 332.33 teńge boldy» dep málimdedi Ulttyq bank.

Qarjy uıymynyń habarlaýynsha, «Ulttyq qordyń túsimderi men paıdalanylýy týraly» 1 qyrkúıektegi esepte qamtylǵan 1,2 trln teńgeni keıbir BAQ Ulttyq qordyń kirisi dep ataıdy. Shyn máninde, ol qordyń tabysy emes.