Bıylǵy jarty jylda 21 esirtki zerthanasy joıyldy - mınıstr

NUR-SULTAN. QazAqparat – Bıylǵy alty aıda Іshki ister mınıstrligi 21 esirtki zerthanasyn joıǵan. Bul týraly vedomstvonyń jartyjyldyq jumysyn qorytyndylaǵan mınıstr Marat Ahmetjanov málim etti, dep habarlaıdy QazAqparat tilshisi.

«Bıyl 3,5 myńnan astam esirtki qylmysy anyqtaldy. 3 tonnadan astam esirtki tárkilendi. Onyń 84 kelisi – sıntetıkalyq esirtki. Sonymen qatar, 21 esirtki zerthanasy joıylyp, úsh uıymdasqan qylmystyq toptyń joly kesildi», - dep atqarylǵan jumystardyń nátıjesine toqtaldy vedomstvo basshysy.

Budan bólek, mınıstr 6 aıda tirkelgen turmystyq zorlyq-zombylyq faktilerine toqtaldy.

«Jyl basynan beri polıtsııaǵa turmystyq zorlyq týraly 70 myń habarlama tústi. 43 myń jaǵdaıda shaqyrýshy aryz berýden bas tartqan. Biri jábirleýshimen tatýlassa, endi biri qaıtalanatyn qaýipten qorqady. Bul jerde tártip saqshysynyń ókilettigi shekteýli. Aryz bolmasa, zań buzýshy jaýapqa tartylmaıdy. Sondyqtan, qoǵamda turmysta zombylyq kórsetkenderdi qylmystyq jaýapqa tartý kerek degen usynys ta kóbeıdi. Osyǵan oraı, turmystyq qylmysqa qatysty zańnamaǵa túzetý engizip, ákimshilik qamaýǵa alý merzimin ulǵaıtyp, eskertý ornyna qoǵamdyq jumysqa tartý kerek», - dedi Marat Ahmetjanov.

Eske sala keteıik, buǵan deıin turmystyq zorlyq-zombylyq kórgenderdiń 63 paıyzy aryz jazýdan bas tartatynyn habarlaǵan edik.

Budan bólek, Іshki ister mınıstriniń elimizdegi urlyq kóp jasalatyn úsh óńir týraly aıtqanyn jazǵan bolatynbyz .