Bıylǵy UBT-da bógde adamnyń talapker ornyna kirý faktisi tirkelgen joq – Ulttyq testileý ortalyǵy

ASTANA. QazAqparat – Bıylǵy UBT-da bógde adamnyń talapker ornyna kirý faktisi tirkelmegen. Bul týraly Ulttyq testileý ortalyǵynyń dırektory Rýslan Emelbaev ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Oqýǵa túsýshiniń test tapsyrý ornynda negizgi kameradan basqa, testilenýshiniń dybysyn jazý jáne qozǵalysyn tirkeý úshin aldyńǵy veb-kamera ornatyldy. Frontaldy veb-kamera talapkerdiń jeke basyn sáıkestendirýge jáne UBT kezinde bógde adamdardyń kirýin anyqtaýǵa múmkindik beredi. Sondaı-aq bul qaǵıdat emtıhan tapsyrý barysyna baqylaý júrgizý jáne testileýdiń ashyqtyǵyn qamtamasyz etý úshin qajet. Bıyl UBT-da bir de bir bógde tulǵa anyqtalǵan joq. Esterińizge sala ketsem, 2021 jyly bundaı 18 jaǵdaı, 2022 jyly 1 jaǵdaı anyqtalǵan edi», - dedi ol.

Ortalyq dırektorynyń aıtýyna qaraǵanda, bıylǵy talapkerlerdiń 18%-y «matematıka-fızıka» pánderin tańdaǵan.

«Jalpy kombınatsııalarǵa kelsek, qazirgi tańda talapkerlerdiń 18%-y «Matematıka-Fızıka», 17%-y «Bıologııa-Hımııa», 13%-y «Shyǵarmashylyq», 10%-y «Matematıka-Informatıka» pánderin tańdady.

Osyǵan deıin aıtylǵandaı, testileý qorytyndysy boıynsha 135 myńǵa jýyq talapker shekti ball jınady, bul qatysýshylardyń jalpy sanynyń shamamen 83%-yn quraıdy. Al beıindik pánder kombınatsııasy boıynsha shekti baldarǵa kelsek, «Matematıka-Fızıka» pánderin tańdaǵan 47 myń talapkerdiń 74%-y shekti ball jınaǵan.

Sondaı-aq, «Bıologııa-Hımııa» tańdaǵan 40 myń balanyń 77%-y shekti ball jınaǵan», - dedi Rýslan Emelbaev.