Bıylǵy toǵyz aıda 1 jasqa deıingi 2,6 myń sábı kóz jumdy – statıstıka

NUR-SULTAN. QazAqparat – Bıylǵy toǵyz aıda Qazaqstanda 338,8 myń shaqalaq dúnıege kelse, 1 jasqa deıingi 2682 sábı kóz jumǵan. Bul týraly QR Strategııalyq josparlaý jáne reformalar agenttigi Ulttyq statıstıka bıýrosynan málim etti, dep habarlaıdy QazAqparat.

2021 jylǵy 1 qazandaǵy jaǵdaı boıynsha, elimizdegi halyq sany 19062,6 myń adamdy qurady. Onyń ishinde qalada – 11303,6 myń (59,3%), aýyldarda 7759,0 myń adam (40,7%) turady. 2020 jylǵy 1 qazanmen salystyrǵanda halyq sany 253,4 myń adamǵa nemese 1,3% ósti.

Bıylǵy qańtar-qyrkúıekte respýblıka halqynyń tabıǵı ósimi ótken jyldyń sáıkes kezeńimen (189,3 myń adam) salystyrǵanda 6,3% artyp, 201,2 myń adamdy qurady.

AHAT organdarynyń málimetine sáıkes, jyl basynan bergi toǵyz aıda 338,8 myń shaqalaq dúnıege kelgen. Bul 2020 jylǵy qańtar-qyrkúıekke (313,9 myń adam) qaraǵanda 7,9% kóp.

Atalǵan kezeńde elimizde 137,6 myń adam qaıtys body. Bul 2020 jylǵy qańtar-qyrkúıekke (124,7 myń adam) qaraǵanda 10,4% kóp.

Bıylǵy qańtar-qyrkúıek aralyǵynda respýblıkada 1 jasqa deıingi 2682 náreste shetinegen. Bul, 2020 jylǵy tıisti kezeńmen salystyrǵanda (2448 shetinegen náreste) 9,6% kóp.