Bıylǵy shomylý maýsymynda ShQO-da 7 adam qutqaryldy
ShQO Tótenshe jaǵdaılar departamenti baspasóz qyzmetiniń málimetine súıensek, jaz bastalǵaly óńir boıynsha 6 adam sýǵa batyp ketti. Barlyq oqıǵa shomylýǵa jabdyqtalmaǵan jerlerde bolǵan.
«Qaıǵyly jaǵdaılardyń negizgi sebepteri – júzý kezinde óz kúshin asyra baǵalaý jáne mas kúıde shomylý. Maýsym aıynan bastap qutqarýshylar volonterlermen jáne jergilikti atqarýshy organ ókilderimen birlesip, turaqty túrde profılaktıkalyq reıdter júrgizýde. Sonyń barysynda 5 myńnan astam demalýshy qamtyldy. Azamattarǵa sý aıdyndarynda júris-turys jáne qaýipsizdik erejeleri túsindirildi. Jaz shyqqaly qutqarýshylar sýǵa batyp bara jatqan 7 adamǵa kómekke kelip, ómirlerin saqtap qaldy», - deıdi departament bastyǵynyń orynbasary Arman Toqanov.
TJD qyzmetkerleri men polıtseıler jaǵalaýlardy tekserý barysynda 76 quqyq buzýshyny anyqtady. Onyń ishinde 26 adam jalpy sý paıdalaný qaǵıdalaryn buzǵany úshin, 6 adam sý aıdyndaryndaǵy qaýipsizdik erejelerin saqtamaǵany úshin, 34 adam jaǵalaýda alkogoldi ishimdikterdi ishkeni úshin, 10 adam kemelerdi paıdalaný qaǵıdalaryn buzǵany úshin ákimshilik jaýapkershilikke tartyldy.