Bıylǵy sanaq 2009 jylǵydan 2,6 ese arzan – Álıhan Smaıylov
«Biz halyq sanaǵyn BUU jarııalaǵan 2020 jylǵy halyq jáne turǵyn úı qory sanaqtarynyń Dúnıejúzilik raýndy aıasynda ótkizemiz. Sanaq barlyq elderde ótkiziledi, bıyl álemniń 61 elinde sanaq júrgizý josparlanǵan. Bilim berý, kóshi-qon, tabys, jumyspen qamtý, neke jaǵdaıy, bala týý, bala týýdy josparlaý, tilderdi meńgerý dárejesi, dinge kózqaras jáne adamnyń tynys-tirshiligin shekteıtin faktorlardyń bolýy sııaqty máseleler boıynsha tolyq aqparatty alýǵa tek jappaı sanaq qana múmkindik beredi. Bundaı derekter memlekettik bazalarda joq», - dedi Úkimet basshysynyń birinshi orynbasary.
Onyń sózine qaraǵanda, sanaq júrgizý kezinde qaǵazdyń ornyna planshet qoldaný sharanyń shyǵyndaryn birshama azaıtpaq.
«Tsıfrlyq tehnologııalardyń engizilýine, protsesti avtomattandyrýǵa jáne qaǵaz qujattyń ornyna planshetterdi qoldanýǵa baılanysty sanaq 2009 jylǵy sanaqtyń shyǵyndaryna qaraǵanda 2,6 ese arzan. Bul rette derekterdiń sapasy men aqparatty jınaý jedeldigi aıtarlyqtaı jaqsarady. Sanaq aıaqtalǵan soń planshetter mektepter men aýrýhanalarǵa beriledi. Sanaq júrgizý - búkil qoǵamnyń qatysýyn talap etetin aýqymdy is-shara. Sonymen birge, taldaý keıbir óńirlerde, atap aıtqanda Mańǵystaý oblysynda, Shymkent qalasynda, Aqtóbe jáne Qaraǵandy oblystarynda daıyndyq jumysy tıisti deńgeıde júrgizilmeı jatqanyn kórsetedi.
Osyǵan baılanysty barlyq jergilikti atqarýshy jáne ortalyq memlekettik organdar Іs-sharalar josparyn qatań ustanýy jáne belgilengen merzimderde ulttyq halyq sanaǵynyń sapaly júrgizilýin qamtamasyz etýi qajet», - dedi Álıhan Smaıylov.