Bıylǵy oqý jyly Aqmola oblysynda dástúrli formatta ótedi

KÓKShETAÝ. QazAqparat – Bıylǵy oqý jyly dástúrli formatta ótedi. Sabaqtyń uzaqtyǵy 45 mınýtqa sozylady. Al, aptadaǵy oqý kúnderiniń sanyn mektepter ózderi anyqtaıtyn bolady. Bul týraly brıfıngide Aqmola oblystyq bilim basqarmasy basshysynyń orynbasary Valerıı Gamazov málimdedi, dep habarlaıdy QazAqparat tilshisi.

Basqarma basshysynyń orynbasary atap ótkendeı, bıylǵy oqý jyly sanıtarlyq-gıgenalyq talaptarǵa saı dástúrli formatta ótedi.

«Ózderińiz biletindeı bıylǵy 1 qyrkúıekte birinshi synyp oqýshylaryna arnalǵan sharalar ótedi. Onda eń kishkentaı oqýshylarǵa arnalǵan alǵashqy oqýlyq beriledi. 2-11 synyptar úshin birinshi oqý kúni synyp saǵaty formatynda uıymdastyrylady», - dep atap ótti V.Gamazov.

Onyń aıtýynsha, mektepterdegi sabaq dástúrli 45 mınýttyq formatqa oralady.

«Ótken jyly sabaq uzaqtyǵy 40 mınýtty qurady. Bıyl qaıtadan 45 mınýttyq formatqa oralamyz. Bes kúndik nemese alty kúndik oqý aptasy týraly máseleni árbir mektep óziniń jumys júktemesine qaraı óz betinshe sheshetin bolady. Oqý josparlary ózgeredi. Mysaly, fakýltatıv sany azaıady. Mektepterdiń oqý josparyn tańdaýǵa quqyǵy bar. Biraq tutastaı alǵanda, biz oqýshyǵa júktemeniń tómendeý tendentsııasyn atap ótemiz, ıaǵnı jeke pánder boıynsha qysqartý. Bul rette qysqartý oqytýdyń fakýltatıvtik bóligine ǵana qatysty bolady», - dep tolyqtyrdy V.Gamazov.

Aıta ketsek, bıyl jańa oqý jylynda oblystyń 552 mektebine 130 myńnan astam oqýshy barady, olardyń 13659-y birinshi synyp oqýshylary.