Bıylǵy qýańshylyq mańǵystaýlyq sharýalardy qaýyrt qımyldaýǵa májbúrlep otyr

AQTAÝ. QazAqparat - Sońǵy jyldary Mańǵystaý oblysynda qýańshylyq beleń alyp, ásirese bıylǵy jyl sharýalarǵa tym aýyr soǵyp otyr dep habarlaıdy QazAqparat tilshisi.

Jaýyn-shashynnyń bolmaýy, tasymaldanatyn jem-shóptiń jetispeýi, ystyqtyń erte túsýi, munyń barlyǵy tórt túliktiń kútimine keri áserin tıgizgeli tur.

Óńirdegi sharýalardyń jeke malyna qajetti azyq qamdaý úshin ótken aptada oblys ákiminiń tapsyrmasymen shuǵyl jumystar qolǵa alynǵan edi.

Elimizdiń ózge óńirlerinen jem-shóp satyp alyp, sharýalarǵa úlestirý úshin «Kaspıı» ÁKK arqyly tıisti qarajat bólindi.

Sonymen qatar oblys ákimdigi tarapynan mal azyǵyn jetkizý, jaıylym men shabyndyq jerlerdi paıdalaný boıynsha Qostanaı, Batys Qazaqstan, Aqtóbe oblystarymen kelissózder júrgizilýde.

Osyǵan oraı oblys ákiminiń orynbasary Ǵ.Nııazov bastaǵan jumys toby Aqtóbe oblysynyń Alǵa, Baıǵanın, Mártók, Muǵaljar, Qobda, Temir aýdandaryna arnaıy baryp, naqty kelisimshart jasaıdy.

Al óńirdiń shalǵaıynda ornalasqan Beıneý aýdanynyń ákimi sharýalarǵa kómektesý maqsatynda Aqtóbe oblysyna baryp, kórshi aýdan basshylarymen kelisimge keldi.

Beıneý aýdanynyń ákimi B.Ábilov bastaǵan, quramynda aýyl sharýashylyǵy mamandary men depýtattar bar arnaıy delegatsııa Aqtóbe oblysy Baıǵanın aýdany ákimi Qaırat Orynbasaruly Otarovpen aýdan ortalyǵy Qaraýylkeldi aýylynda kezdesý ótkizdi.

Kezdesýdiń basty maqsaty bıylǵy qýańshylyq saldaryn joıý úshin mal azyǵyn daıyndaýǵa shabyndyq, shekaralas aımaqtarda maýsymdyq jaıylymdardy paıdalaný máselelerin talqylaý boldy.

Qaraýylkeldidegi kezdesý barysynda Beıneý delegatsııasy kórshi aýdannyń tynys tirshiligimen tanysty, birqatar áleýmettik nysandaryn aralady, aýyl sharýashylyǵy ardageri Rahym Sembiǵalıev Mańǵystaý oblysymen shektesetin Aqtóbe oblysyna qarasty aımaqta Keńes úkimeti kezeńinde 1950-1993 jyldary Jetiqaq, Kóltaban, Múlki aman, Saroı t.b. jer-sýlaryn tarıhı Beıneý aýdanyna qarasty Sam, Syńǵyrlaý sovhozdarynyń malshylary eki jaqty kelisimmen jaılaý retinde paıdalanylǵany týraly derekter jetkizildi.

Áriptestik nátıjesinde:

1. Jetiqaq jerin paıdalanyp otyrǵan Beıneý aýdanyna qarasty sharýashylyq ıelerine túsinistikpen qarap, jer máselesin zańdastyrý;

2. Baıǵanın aýdanyna qarasty jerlerden shabyndyqqa jaramdy jerler bolsa, Beıneý aýdanynyń shóp shabýshy brıgadalaryna jer bólý;

3. Baıǵanın aýdanyna qarasty sharýalardan tıimdi baǵada jem-shóp satyp alý;

4. Shekaralas aımaqta dala órtterin boldyrmaý, aldyn alý jáne onyń saldaryn birigip joıý sekildi baǵyttarda kelesim júrgizilip, Memorandýmǵa qol qoıyldy.