Bıylǵy qańtar-naýryzda elimizde 2,9 mln sharshy metr turǵyn úı paıdalanýǵa berildi
«Qurylys sektoryndaǵy ósý qarqyny jedeldedi. Oryndalǵan qurylys jumystarynyń kólemi 13,1 paıyzǵa ulǵaıdy. Kópfýnktsıonaldy qonaq úı-týrıstik kesheniniń qurylysy boıynsha jumystardyń aıaqtalýyna baılanysty Mańǵystaý oblysyn qospaǵanda, barlyq óńirler oń ósim kórsetti», - dedi mınıstr Úkimet otyrysynda bıylǵy qańtar-naýryzdaǵy qorytyndylardy baıandaı kele.
Onyń aıtýynsha, joǵary ósý Túrkistan oblysynda mádenıet jáne sport nysandary, kóppáterli turǵyn úıler, magıstraldyq gaz qubyry men kólik joldary qurylysynyń ulǵaıýyna baılanysty. Osyndaı kórsetkish Soltústik Qazaqstan oblysynda densaýlyq saqtaý, bilim berý jáne aýyl sharýashylyǵy nysandaryn salýǵa baılanysty baıqalyp otyr. Almaty qalasynda metro, bilim berý nysandaryn salý ári elektr jelilerin damytý esebinen joǵary ósim tirkeldi.
«Bıylǵy qańtar-naýryzda 2,9 mln sharshy metr turǵyn úı paıdalanýǵa berildi. Bul ótken jyldyń kezeńinen 8,6 paıyzǵa joǵary. Pavlodar oblysynan basqa barlyq óńirler oń ósim kórsetti. Turǵyn úıdi eń kóp 5,9 ese paıdalanýǵa berý Shymkent qalasynda baıqaldy» - dedi Á. Erǵalıev.