Bıylǵy bes aıda eldiń eksport kólemi artqan

NUR-SULTAN. QazAqparat – Bıylǵy bes aıda Qazaqstannyń syrtqy taýar aınylymy 51,3 mlrd dollarǵa jetti. Bul ótken jyldyń sáıkes kezeńimen salystyrǵanda 40,7 paıyzǵa kóp, dep habarlaıdy QazAqparat tilshisi Saýda jáne ıntegratsııa mınıstrligine silteme jasap.

Mınıstrlik málimetinshe, qańtar-mamyr aralyǵynda elimizdiń eksport kólemi 59,1% paıyzǵa ósip, 34,2 mlrd dollar bolǵan. Atalǵan ýaqyt ishinde shıki munaı eksporty - 91,2%, ferroqorytpalar - 61,1%, mys jáne katodtar -25,3%, bıdaı - 61,3%-ǵa artqan. Atalǵan taýarlar ásirese Italııa (5759,4 mln dollar), Qytaı (5114,7 mln dollar) jáne Reseıge (2668,7 mln dollar) kóp eksporttalǵan.

Vedomstvo habarlaýynsha, bes aıdaǵy ımport kólemi de 14,4 paıyzǵa ósip, 17,1 mlrd dollardy quraǵan. Onyń basym bóligi dárilik zattar, mys kenderi men kontsentrattary jáne qara metaldardan jasalǵan ózge de buıymdar.

Eske sala keteıik, buǵan deıin Qazaqstandyq drondardy eksportqa shyǵarý josparlanyp otyrǵanyn habarlaǵan edik.