Bıylǵy bes aıda Aqmola oblysynda 2085 otbasy baspanaly boldy

KÓKShETAÝ. QazAqparat - Bıylǵy bes aıda Aqmola oblysynda 239,3 myń sharshy metr turǵyn úı paıdalanýǵa berilip, 2085 otbasy baspanaly boldy. Bul týraly aımaq basshysynyń orynbasary Asqar Muratuly óńirde «Nurly jer» baǵdarlamasyn júzege asyrý barysy týraly jýrnalıstermen ótkizgen brıfıngte aıtty, dep habarlaıdy QazAqparat tilshisi.

Asqar Muratulynyń aıtýynsha, «Nurly jer» baǵdarlamasynyń basty baǵyttarynyń biri – biryńǵaı basty saıasatyn júzege asyrý bolyp tabylady. Onyń ishinde halyqtyń áleýmettik áljýaz toptary men kópbalaly otbasylardy pátermen qamtý kózdelgen.

«Bıyl satyp alý quqyǵynsyz jalǵa beriletin turǵyn úı qurylysyna respýblıkalyq bıýdjetten 2 889,3 mıllıon teńge somasynda nysanaly transfert bólindi. Oblys boıynsha salynyp jatqan 6 jalǵa beriletin turǵyn úıdegi 290 páterdiń 86-sy kópbalaly otbasylarǵa arnalǵan», - dep atap ótti Asqar Muratuly.

Qazirgi kezde 38 kóppáterli turǵyn úıdiń qurylysy júrgizilýde. Onyń ishinde 20 turǵyn úı jalǵa berý ádisi boıynsha tapsyrylsa, qalǵandary bankterdiń nesıelik baǵdarlamalary arqyly úlestiriledi.

«Bıylǵy jyldyń birinshi jartyjyldyǵynyń qorytyndysy boıynsha oblys boıynsha barlyǵy 275 sharshy metr baspanany paıdalanýǵa berý josparlanǵan. Bul ótken jyldyń sáıkes kezeńimen salystyrǵanda birshama joǵary. Al, jyl sońyna deıin Aqmola oblysynda 174 kópbalaly otbasy baspanaly bolady», - dep tolyqtyrdy Asqar Muratuly.