Bıylǵy 9 aıda Qazaqstan men Serbııa arasyndaǵy saýda kólemi 52,9 mln dollarǵa jetti

ASTANA. QazAqparat – Belgrad qalasynda Qazaqstan men Serbııa syrtqy saıası vedomstvolarynyń saýda-ekonomıkalyq jáne mádenı-gýmanıtarlyq salalardaǵy yntyqtaqtastyqty keńeıtýge baǵyttalǵan keńesi ótti. Bul týraly QazAqparat tilshisi QR Syrtqy ister mınıstrligine silteme jasap habarlaıdy.

«Qazaqstan men Serbııa taraptary kún tártibindegi ózekti máselelerdi talqylady, sondaı-aq saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy ózara tıimdi yntymaqtastyqty odan ári nyǵaıtýǵa degen ortaq nıettiń bar ekenin rastady. Sonymen qatar, kópjaqty formattaǵy ózara is-qımyl men halyqaralyq máselelerge erekshe nazar aýdaryldy.

Serbııa Qazaqstannyń Balqan óńirindegi mańyzdy seriktesi bolyp tabylady. Bıylǵy 9 aıdyń qorytyndysy boıynsha ekijaqty saýda aınalymy 52,9 mln dollarǵa jetti. Bul – ótken jylmen salystyrǵanda 3,7 esege artyq. Qazaqstanda serb kapıtalynyń qatysýymen 36 kásiporyn jumys isteıdi», - delingen mınıstrliktiń málimdemesinde.

Atalǵan kezdesýde taraptar keleshegi zor aýyl sharýashylyǵy, týrızm, energetıka men áskerı-tehnıkalyq saladaǵy yntymaqtastyqty odan ári arttyrýǵa negizdelgen jumystardy qolǵa alýǵa nıet bildirdi.