Bıylǵy 8 aıda 30,2 mlrd. tekshe metr gaz óndirildi

ASTANA. QazAqparat - 2015 jyldyń qańtar-tamyzynda Qazaqstanda gaz óndirý kólemi 30,2 mlrd. tekshe metrdi qurap, ótken jyldyń kórsetkishinen 6 paıyzǵa asyp tústi.

Bul týraly búgin Ortalyq kommýnıkatsııalar qyzmetindegi baspasóz máslıhatynda QR Energetıka birinshi vıtse-mınıstri Uzaqbaı Qarabalın málim etti.

«Munaı óndirýde kóbinese ilespe kúıde shyǵatyn gaz týraly aıtatyn bolsaq, ony óndirý deńgeıi sońǵy jyldary artyp keledi. Bıylǵa gaz óndirý jospary 42,2 mlrd. tekshe merdi qurap otyr. Qańtar-tamyzda 30,2 mlrd. tekshe metr gaz óndirildi jáne bul kórsetkish byltyrǵy sáıkes kezeńge qaraǵanda 6 paıyzǵa artyq. Osy oraıda aǵymdaǵy jyly gaz óndirýde ońtaıly qarqyn qalyptasyp otyr», - dedi mınıstrdiń orynbasary.

Sonymen qatar ol 2015 jyldyń qańtar-tamyzynda 1 mln. 691 myń tonna suıytylǵan munaı gazy óndirildi. Bul ótken jyldyń osy kezeńimen salystyrǵanda 7 paıyzǵa artyq. Bıylǵa josparlanǵan óndirý kólemi 2 mln. 519 myń tonnany qurap otyr.