Bıylǵa - 50 páter: Jastarǵa arnalǵan baspana endi Qostanaıda iske qosylady

QOSTANAI. QazAqparat - Qostanaı oblysynda «Jas shańyraq» baǵdarlamasyn oryndaý maqsatynda jol kartasy ázirlenip, bekitildi, dep habarlaıdy QazAqparat.

Bul jaıynda oblys ákimi Arhımed Muhambetov Instagram paraqshasynda keńirek aıtyp berdi.

Aıta ketý kerek, jastarǵa jeńildetilgen nesıe berý baǵdarlamasy bıyl 50-ge jýyq jas otbasyn turǵyn úımen qamtamasyz etýge múmkindik beredi. Kelesi jyly 100 páterge deıin ulǵaıtý josparlanǵan.

Baǵdarlamaǵa qatysatyn úmitkerler Qostanaı qalasynda keminde 2 jyl turaqty tirkelgen, qala aýmaǵynda talap etiletin salalarda keminde 1 jyl jumys ótili bolýy mindetti.

«Úmitkerdiń jáne onymen birge turatyn otbasy músheleriniń QR aýmaǵynda menshik quqyǵyndaǵy turǵyn úıi jáne sońǵy 5 jyl ishinde ıelikten shyǵarý faktileri, sondaı-aq QR aýmaǵynda memlekettik baǵdarlamalar jelisi boıynsha alynǵan jalǵa beriletin turǵyn úı bolmaýy tıis. Baǵdarlamaǵa qatysýshy nemese otbasy músheleri kámeletke tolǵanǵa deıin alǵan jyljymaıtyn múliktegi úlesi jekeshelendirý nemese muragerlik quqyǵy esepke almaǵanda. Ótinish berýshiniń satyp alynatyn turǵyn úıdi kelesi 5 jyl ishinde ıelikten shyǵarýǵa quqyǵy joq» dep jazady oblys ákimi.

Otbasynyń bir múshesine shaqqandaǵy sońǵy 6 aıdaǵy tabysy 6 eń tómen kúnkóris deńgeıinen aspaýy tıis.

Aıta keteıik, baǵdarlamaǵa erli-zaıyptylardyń bireýi ǵana qatysa alady.

Baǵdarlamany ázirleý kezinde Nur-Sultan men Almaty qalalasy, Qaraǵandy jáne Jambyl oblysynda jastarǵa arnalǵan turǵyn úı baǵdarlamasyn iske asyrý tájirıbesi negizge alyndy.

Qostanaı - osy baǵdarlamany júzege asyratyn 5-shi óńir.