Bıyldan bastap sýdıa laýazymyna kandıdattar psıhologııalyq test tapsyratyn bolady

ASTANA. QazAqparat - Bıyldan bastap elimizdegi sýdıa laýazymyna úmitkerler psıhologııalyq test tapsyratyn bolady. Bul týraly QR Joǵarǵy sot sýdıalar keńesiniń otyrysynda QR Joǵarǵy sotynyń Tóraǵasy Qaırat Mámı málimdedi. Eske salaıyq, keńeste «2015-2025 jyldarǵa arnalǵan sybaılas jemqorlyqqa qarsy strategııany iske asyrý aıasynda sot organdarynda sybaılas jemqorlyqtyń aldyn alýdyń negizgi baǵyttary» atty taqyryp qaralǵan edi.

Joǵarǵy sot Tóraǵasynyń aıtýynsha, qazirgi tańda sot júıesiniń barlyq deńgeıinde kadrlyq rezervpen jumystyń tıimdiligin arttyrýdy kózdelip otyr. «Jalpy sot júıesindegi kadrlyq rezerv is júzinde óz qyzmettik mindetin adal atqaratyn sýdıalar úshin laýazymy joǵarylaıtyndyǵyna kepil bolýy shart. Rezervte turǵan tulǵalardy kásiptik qaıta daıarlaý jáne biliktiligin arttyrý júıesin jetildirýge erekshe kóńil bólinedi. Sondyqtan da, qazirgi kúni sýdıa laýazymyna úmitkerlerdi usynǵan kezde kepildik etý ınstıtýtyn engizý qajettiligi zerttelip jatyr», - dedi Q.Mámı.

Tóraǵanyń aıtýyna qaraǵanda, bıylǵy jyldan bastap sýdıalyqqa kandıdattardy psıhologııalyq testileýden ótkizý josparlanyp otyr. Budan bólek, qazirgi ýaqytta arnaıy jumys toby sot táýelsizdiginiń deńgeıin kóterý baǵytynda qosymsha usynystardy qarastyryp jatyr. Bul másele múddeli memlekettik organdarmen kelisilgennen keıin, Joǵary sot osy baǵyttaǵy keshendi is-sharalardy júzege asyrýǵa kirispek.