Bıyldan bastap SQO-da bastaýysh synyp oqýshylary tegin tamaqtanady - ákim

ASTANA. QazAqparat – 1 qyrkúıekten bastap SQO-nyń barlyq mektepterindegi bastaýysh synyp oqýshylary tegin tamaqpen qamtylady. Bul týraly oblys basshysy Aıdarbek Saparov málim etti, dep habarlaıdy QazAqparat tilshisi.

«Soltústik Qazaqstan oblysynda 1 qyrkúıekten bastap barlyq mektepterdiń bastaýysh synyp oqýshylary tegin tamaqpen qamtamasyz etiledi. Bul maqsatqa bıýdjetten 2,5 mlrd teńge bólindi. Odan bólek, qaýipsizdikti qamtý maqsatynda mamandandyrylǵan kúzet pen týrnıketter qoıýǵa 540 mln teńge bólindi. 7 jylda alǵash ret Petropavlda jergilikti bıýdjet esebinen 420 oryndyq 2 balabaqsha salý josparlanyp otyr. Bul balalardyń 95%-yn mektepke deıingi tárbıemen jáne oqytýmen qamtýǵa múmkindik beredi», - dedi Aıdarbek Saparov ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, «Jaıly mektep» ulttyq jobasy aıasynda óńirde birneshe mektep salynbaq.

«2025 jylǵa deıin 7 mektep, onyń ishinde «Jaıly mektep» ulttyq jobasy boıynsha 2 700 oryndyq 4 mektep salý josparda. Bıyl 1 020 oryndyq úsh mektep tapsyrylady. Densaýlyq saqtaý salasyn qarjylandyrý 56%-ǵa ulǵaıdy. «Aýyldyq densaýlyq saqtaýdy jańǵyrtý» ulttyq jobasy aıasynda 46 medıtsınalyq nysannyń qurylysy josparlanǵan», - dedi ákim.