Bıyldan bastap egis jumystaryna arnalǵan dızel onlaın bóline bastaıdy

ASTANA. QazAqparat - Aýyl sharýashylyǵy mınıstrligi bıyl maýsymdyq aýylsharýashylyq jumystaryna dızel otynyn bólýdiń jańa tetikterin iske qosady, dep habarlaıdy QazAqparat AShM baspasóz qyzmetine silteme jasap.

Vedomstvo dızel otynyn bólýdiń barlyq protsesterin, onyń ishinde dızel otynyn jetkizý jónindegi operatorlardy aıqyndaý jónindegi komıssııanyń jumys tártibin jáne operatorlardy aıqyndaý sharttaryn, sondaı-aq dızel otynynyń kólemin sýbsıdııalaýdyń biryńǵaı memlekettik aqparattyq júıesinde elektrondyq qalyptastyrý jáne bólý protsesin qamtıtyn qaǵıdalar jobasyn ázirledi.

Sharýalar úshin janarmaı kólemin qalyptastyrý jáne bólý aýyl sharýashylyǵy daqyldarynyń túrleri boıynsha 1 gektarǵa dızel otyny shyǵysynyń normatıvterine sáıkes, egis alqaptaryn eskere otyryp júrgiziledi.

Dızel otynyn alýshylardyń tizilimi gosagro.kz. portalynda avtomattandyrylǵan rejımde jasalady.

Qazirgi ýaqytta qaǵıda jobasy salalyq qoǵamdyq uıymdar men «Atameken» UKP-da qaraý jáne kelisý rásiminen ótip jatyr.

Qujattyń jobasymen «Ashyq NQA» portalynda da tanysýǵa bolady.

Barlyq kelip túsken eskertýler men usynystar qaralady jáne negiz bolǵan jaǵdaıda qaǵıdalar jobasyn pysyqtaý kezinde eskeriledi.

Aıta keteıik, dızel otynyn elektrondyq bólýdi SBMAJ-ǵa respýblıka óńirlerinde pılottyq rejımde synaqtan ótkizgennen keıin ǵana engizý josparlanyp otyr.