Bıyldan bastap 81 HQKO jańǵyrtylǵan túrde jumys istep jatyr

ASTANA. 12 qazan. QazAqparat -  Memlekettik qyzmetterdi avtomattandyrýdy baqylaý jáne Halyqqa qyzmet kórsetý ortalyǵynyń qyzmetin úılestirý komıtetiniń aqparatyna sáıkes, aǵymdaǵy jyldan bastap 81 halyqqa qyzmet kórsetý ortalyǵy jańǵyrtylǵan túrde jumys isteýde,

solardyń ishinde Aqmola oblysyna qarasty 19 aýdandyq HQKO bar. Bul týraly Kólik jáne kommýnıkatsııa mınıstrliginiń baspasóz qyzmetinen habarlandy.

Esterińizge salyp ótsek, Astana jáne Almaty qalalaryndaǵy 28 HQKO 2011 jyly jańǵyrtýdan ótken bolatyn. Onyń barysynda memlekettik qyzmetterdi usynýdyń bıznes-úderisteri ózgertilip, kedergisiz qyzmet kórsetý ádisi men biryńǵaı elektrondyq kezek engizildi, ǵımaratqa jóndeý jumystary júrgizildi. Aýmaǵy úlken HQKO-da elektrondyq úkimet buryshtary uıymdastyryldy. Atalǵan buryshtarda keńesshiler elektrondyq anyqtamalar men elektrondyq tsıfrlyq qoltańbany (ETsQ) alý tártibin, salyq jáne aıyppuldardy tóleý tártibin úıretip, aqparattyq keńes beredi.

Jańartylǵan HQKO-da kelýshilerdiń ózderine qyzmet kórsetken qyzmetkerlerdiń jumysyn baǵalaý múmkindigi iske asyryldy. Ár azamat ózinen qujat qabyldap, tıisti aqparat bergen ortalyq qyzmetkeriniń jumysyna baǵa berýi tıis. Jańǵyrtý barysynda atqarylyp jatqan sharalardyń barlyǵy da halyqqa qyzmet kórsetý sapasyn arttyrýǵa baǵyttalǵan.

Osy jyldyń sońyna deıin respýblıkanyń barlyq HQKO-yn jańǵyrtýdan ótkizý josparlanǵan.