Bıyl jumys kúshi tapshy óńirlerge basqa óńirlerden 1 300-den astam otbasy kóshirildi

ASTANA. QazAqparat – Jyl basynan beri jumys kúshi tapshy óńirlerge basqa óńirlerden 1 300-den astam otbasy kóshirildi. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Óńir ákimderi Óńirlik jumyspen qamtý kartalaryn bekitken bolatyn. Bıyl jumysqa ornalastyrý boıynsha josparly kórsetkish – 947 myń adam. Jergilikti jumyspen qamtý organdary «10 myń turǵynǵa – 100 jumys orny» bastamasy boıynsha sýbsıdııalanatyn jumys oryndary aıasynda belsendi jumys júrgizýde. Jumys berýshige adamdardy jumysqa qabyldaý tıimdi bolady. Óıtkeni, ol úshin jergilikti bıýdjetten sýbsıdııa alady», - dedi Úkimet basshysy.

Onyń atap ótýinshe, jyl basynan beri jumys kúshi tapshy óńirlerge basqa óńirlerden 1 300-den astam otbasy kóshirildi.

«Bul – jaqsy kórsetkish. Sonymen qatar kóship kelýshilerdiń jańa jerde turaqtap qalýǵa múddeli bolýy úshin olardyń beıimdelýine kóbirek kóńil bólý qajet. 1-shi shildeden bastap óńirlerde Eńbek utqyrlyǵy ortalyqtary jumys isteı bastady. Búkil respýblıka boıynsha jumys oryndarynyń biryńǵaı bazasy qurylýda. Bul azamattardyń tek qala nemese aýdan sheginde ǵana emes, sondaı-aq óz oblysynda nemese odan tysqary jerlerdegi bos jumys oryndaryna jumysqa turýyna múmkindik beredi», - dedi Álıhan Smaıylov.