Bıyl JOO-ǵa qujat arnaıy tsıfrlyq platforma arqyly qabyldanady

NUR-SULTAN. QazAqparat - Osy jyly elimizdiń joǵary oqý oryndary túlekterdiń qujattaryn mınıstrliktiń biryńǵaı tsıfrlyq platformasy arqyly qabyldaıdy. Bul týraly Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.

«Alda túlekterdi qorytyndy emtıhandar kútip tur. Ásirese, jazdygúni ýnıversıtetter men kolledjderdiń jumysy qyza túspek. Bıyl oqý oryndaryna qujat qabyldaý bizdiń mınıstrliktiń arnaıy tsıfrlyq platformasy arqyly júzege asyrylady. Arnaıy platforma arqyly qujat tapsyrý tek memlekettik grantqa úmitti túlekter úshin ǵana emes, sonymen qosa aqyly bólimde oqýdy josparlaǵan túlekterge de qatysty», - dedi Ashat Aımaǵambetov atalǵan vedomstvoda ótken apparattyq jınalysta.

Mınıstrdiń aıtýynsha, grant nemese aqyly bólimge oqýǵa túsetin barlyq túlek úshin talap ortaq.

«Osylaısha qujattar qabyldaý bir júıe arqyly iske asady. Sondyqtan JOO-ǵa eskertý, baıaǵydaı qujattardy keıin alyp kelersiz deıtin zaman ketti», - deıdi ol.

Aıta ketsek, aldaǵy oqý jylynan bastap stýdentterdiń shákirtaqysy 20 paıyzǵa artady.

Sondaı-aq, mınıstrliktiń apparattyq jınalysynda JOO túlekterin eńbekpen qamtý jónindegi komıssııanyń jumysy synaldy.

Odan bólek, bıyl memlekettik granttardyń 60 paıyzy tehnıkalyq mamandyqtarǵa bólinetini aıtyldy.