Bıyl jol-kólik oqıǵalary 14%-ke kóbeıgen - Úkimet

ASTANA. QazAqparat – Qazaqstanda jol apattarynyń sany 14%-ke, qaza tapqandar sany 18%-ke kóbeıdi. Bul týraly Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Halyqaralyq sarapshylardyń derekteri boıynsha túrli aýrý-syrqaýlar men tabıǵı apattarǵa qaraǵanda kólik apatynan qaza bolatyndar sany kóp. Qazaqstan jol qaýipsizdigi boıynsha álemdik reıtıngide 107-orynda tur. Damyǵan elderge qaraǵanda bizde jol apattarynan qaza tabý yqtımaldyǵy 11 ese joǵary. Jalpy, elimizde jol qaýipsizdigine qatysty jaǵdaı óte kúrdeli», - dedi Á. Smaıylov Úkimettiń búgingi otyrysynda.

8 aıda jol apattarynyń sany 14%-ke ósken. Qaza tapqandardyń sany 18%-ke kóbeıdi. Orta eseppen táýligine 5-6 adam jolda qaza tabady.

«Bul – óte aýyr jaǵdaı. Álemdik tájirıbede qaýipsizdik 3 komponent arqyly, ıaǵnı «Júrgizýshi – Avtomobıl – Jol» boıynsha baǵalanady. Ókinishke oraı, bizde júrgizýshiler arasynda kólik júrgizý mádenıeti óte tómen. Jol erejesin jıi buzatyn shamamen 71 myń júrgizýshi anyqtaldy. Olardyń keıbiri bıyl jol erejesin 150 ret buzǵan. Árıne, mundaı júrgizýshilerdi qatań jazaǵa tartý kerek», - dedi Úkimet basshysy.

Aıta ketsek, jyl basynan Aqtóbe oblysynda 74 adam jol-kólik apatynan kóz jumdy.