Bıyl Jetisýdaǵy Alakólde 5,5 mlrd teńgeniń qyzmeti kórsetilgen

TALDYQORǴAN. QazAqparat - Bıyl Almaty oblysyndaǵy Alakól, Qapshaǵaı, Balqash kólderi mańyndaǵy demalys aımaqtary tynyǵýshylarǵa 6,7 mıllıard teńgeniń qyzmetin kórsetken. Munyń ishinde Alakól kósh bastap tur, bul aımaqtyń úlesi - 5,5 mlrd teńge, dep habarlaıdy QazAqparat tilshisi. 

Al Qapshaǵaı sý qoımasynda bul qarjy kólemi 750 mln teńgege jetse, Balqash kólin tańdaǵandarǵa 32 mln teńgeniń qyzmeti kórsetilgen. 

Almaty oblystyq týrızm basqarmasynyń basshysy Janar Alshymbaevanyń sózinshe, bul kórsetkish byltyrǵy jylmen salystyrǵanda 2 ese kóp. Al bıylǵy shomylý maýsymy kezinde Alakól jaǵalaýy men Balqash kóline jáne Qapshaǵaı sý qoımasyna baryp demalǵandardyń qatary 1 mıllıon 400 myń adamnan asqan. Osylaısha, byltyrǵy jylmen salystyrǵanda qazaqstandyq týrızmdi tańdaǵandar sany 32 protsentke kóbeıip otyr. Jyl sońyna deıin Jetisýdyń týrızm aımaqtaryna baratyndardyń qatary 2 mıllıonǵa jýyqtap, olarǵa kórsetiletin týrıstik qyzmet kólemi 10 mıllıard teńgege jetedi degen boljam da bar. 

«Qazirgi tańda Qazaqstan Respýblıkasynda týrızmdi damytý jónindegi memlekettik baǵdarlamany ázirleý aıasynda Alakól kólindegi týrızmdi damytý boıynsha  master-jospar daıyndap jatyrmyz. Bul úlken qujat bolady. Bul jerde biz týrızmdi damytýda keshendi sharalardy qarastyryp otyrmyz», -dedi Almaty oblystyq týrızm basqarmasynyń basshysy Janar Alshymbaeva.

Esterińizge sala keteıik, Prezıdenttiń mamyr aıyndaǵy Almaty oblysyna sapary barysynda oblys basshysy Amandyq Batalov Alakól aýdanynda kórsetilgen qyzmet kólemi 2017 jyly 3,5 mıllıard teńgege jetkenin aıtqan bolatyn. 

«Sońǵy tórt jylda oblysta týrıstik qyzmet kórsetý kólemi eki ese artty. Bul kórsetkish 2014 jyly 3,9 mıllıard teńgeni qurasa, 2017 jyly 8,3 mıllıard teńgege jetti. 2018 jyly bul kórsetkishti 10 mıllıard teńgege deıin jetkizýdi josparlap otyrmyz. Alakól aýdanynda kórsetilgen qyzmet kólemi 2017 jyly 3,5 mıllıard teńgege jetip, 2014 jylǵy deńgeımen salystyrǵanda 8 ese artty», - degen bolatyn óńir basshysy. 

Aıta ketý kerek, biz buǵan deıin halyqaralyq sarapshylar Alakóldiń bas josparyn daıyndap jatqanyn habarlaǵan bolatynbyz. Osynyń aıasynda sarapshylar Alakóldiń maýsymdyq merzimin uzartýdy usyndy.