Bıyl Jetisý oblysyndaǵy bilim salasynyń bıýdjeti 138 mlrd teńgeden asyp otyr
Bul áleýmettik salaǵa bólingen qarajattyń shamamen 65%-y. Atalǵan qarajat bilim nysandarynyń qurylys jumystaryna, materıaldyq-tehnıkalyq bazasyn nyǵaıtýǵa, ınnovatsııalar men zamanaýı qaýipsizdik júıelerin engizýge jáne basqa da mańyzdy is-sharalarǵa baǵyttalýda.
Bul týraly búgin Taldyqorǵandaǵy І.Jansúgirov atyndaǵy Mádenıet saraıynda ótken pedagogtardyń tamyz konferentsııasynda Jetisý oblysynyń ákimi Beıbit Isabaev aıtty.
Onyń aıtýynsha, óńirde 3 jastan 6 jasqa deıingi balalardy mektepke deıingi bilimmen qamtý kórsetkishi 98,3% qurap otyr. Bilim sapasynyń deńgeıi - 64,2%. Oqytý men tárbıeni teń alyp júrý úshin mektep pen ata-analardyń ózara jaýapkershiligine negizdelgen «oqýshy - mektep - ata-ana» birlesken jumys formaty engiziledi.
Oblys ákimi jastardyń kásibı tehnıkalyq daıarlyǵy máselesine erekshe kóńil bóldi. Aımaqtaǵy kásiptik bilim beretin mekemelerde 50 mamandyq, 93 biliktilik boıynsha mamandar daıarlanady. Qazirgi ýaqytta qajetti mamandyqtar úshin oblystyq bıýdjetten 192,1 mln.teńge bólinip otyr.
«Oblysta irgeli ónerkásip oryndaryn ashýǵa baǵyttalǵan kóptegen iri jobalar qolǵa alynyp jatyr. Bizdiń kolledjderimiz erteńgi kúni solarǵa qandaı mamandar qajet bolady, jastardy qaı baǵytta oqytý kerek degendeı naryqtyń suranysyna beıimdele bilýi tıis. Jergilikti atqarýshy organdar men bilim basqarmasy oblysta jumys isteıtin kásiporyndar men aýyl sharýashylyǵy keshenderine qajetti mamandardy anyqtaý jumystaryn birlesip júrgizýi kerek. Eńbek naryǵyndaǵy usynys pen suranys bir-birimen tepe-teń bolǵanda, jastardy oqytý men jumyspen qamtý, kadr tapshylyǵy sııaqty máseleler birte-birte sheshiletin bolady», - dedi B.Isabaev.
Jalpy oblystaǵy 340 mektepte 15 691 muǵalim, 405 mektepke deıingi bilim berý uıymynda 3328 pedagog jumys isteıdi. Óńirdegi pedagog kadrlarǵa qajettilik 176 birlikti qurap otyr. Sonyń basym bóligi Kerbulaq, Aqsý, Alakól aýdandarynda.