Bıyl jańartylǵan energııa salasynda 23 joba iske asyrylady
«Damýdyń uzaq merzimdi trendtterin taldaý energııanyń kómirteksiz kózderi aıtarlyqtaı suranysqa ıe ekendigin kórsetedi. Qazaqstannyń energetıkalyq júıesiniń damý vektorlarynyń biri - sońǵy bes jylda jańartylatyn energııa kózderi. Prezıdent orta merzimdi kezeńde ekonomıkanyń ósimi meılinshe «jasyl ekonomıka» jaǵdaıynda ilgerileýge tıis degen tapsyrma berdi. Óz kezeginde, biz «Jasyl» ekonomıka tujyrymdamasy aıasynda ózimizge alǵan mindettemelerdi oryndap, eldiń jalpy energııa teńgerimindegi jańartylatyn energııa úlesin 3 paıyzǵa deıin jetkizdik. Sońǵy 5 jylda jańartylatyn energııa kózderi nysandarynyń belgilengen qýaty shamamen 7 esege – 2015 jylǵy 240 MVt-tan 2020 jyly 1634,7 MVt-qa deıin ósti», - dedi N. Noǵaev Energetıka mınıstrliginiń keńeıtilgen alqa májilisinde.
Onyń aıtýynsha, 2020 jyldyń qorytyndylary boıynsha elimizde jumys istep turǵan 115 jańartylatyn energııa kózderi nysany bar, olardyń jıyntyq qýaty - 1634,7 MVt (Jel ES – 486,3 MVt; Kún ES – 911,6 MVt; Sý ES - 229,04 MVt; BıoES - 7,82 MVt).
2020 jyldyń qorytyndysy boıynsha jańartylatyn energetıka nysandary óndiretin elektr energııasynyń kólemi 3,2 mlrd kVt/saǵ qurady.
«Aıta ketý kerek, osy salaǵa shamamen $1,5 mlrd ınvestıtsııa tartylyp, 1310 turaqty jumys orny quryldy, sondaı-aq el óńirlerinde jyl saıyn shamamen 3000 ýaqytsha jumys orny ashylyp keledi. 2021 jyly jalpy qýaty 381,1 MVt bolatyn 23 jobany iske asyryp, shamamen 370 mln dollar ınvestıtsııa tartý josparlanǵan. Bıyl shamamen 3,5 mlrd kVt/saǵ jańartylatyn energııa óndirý josparlanyp otyr», - dedi mınıstr.
Onyń sózine qaraǵanda, 2021 jyly jańartylatyn energııa kózderi boıynsha onlaın-aýktsıondar ótkizý úshin platformany odan ári damytý josparlanǵan.