Bıyl jańa ereje boıynsha 191 kandıdat sýdıa laýazymyna taǵaıyndaldy

ASTANA. QazAqparat - Aǵymdaǵy jyly jańa ereje boıynsha 191 kandıdat sýdıa laýazymyna taǵaıyndaldy. Bul týraly búgin 2017 jyldyń 1 jartyjyldyǵynda sot tóreligin júzege asyrý qorytyndylaryna arnalǵan respýblıka sýdıalarynyń keńeıtilgen otyrysynda QR Joǵarǵy sotynyń tóraǵasy Qaırat Mámı aıtty, dep habarlaıdy QazAqparat.

«Joǵary bilikti sýdıalar korpýsyn  qalyptastyrý  qashanda birinshi kezektegi másele. Sýdıa bolǵysy keletin kandıdattarǵa qoıylatyn biliktilik talaptary men irikteý mehanızmderi aıtarlyqtaı kúsheıtildi.  Aǵymdaǵy jyly jańa ereje boıynsha 191 kandıdat sýdıa laýazymyna taǵaıyndaldy. Sot júıesi óz qyzmetin jańa formatta júzege asyrýda», - dedi ol.

Joǵarǵy sot tóraǵasynyń aıtýynsha, biliktilik komıssııasy bıyl 140 sýdıanyń kásibı qyzmetin tekserip, sýdıalar korpýsynyń basym bóligi kásibı deńgeıiniń joǵary ekendigin dáleldegen.

«Úsh satyly deńgeıdegi sottar  jumysy Memleket basshysy men halyq  tarabynan joǵary baǵalanyp otyr.  Bul Ult josparyn iske asyrý nátıjesinde qol jetkizgen  oń kórsetkishter bolyp sanalady.  Jumysymyzdyń osy baǵytynyń qorytyndysyn shyǵara kele  Ult josparynda kózdelgen barlyq mindetterdi Joǵarǵy sot  tabysty oryndady jáne iske qosylǵan jańashyldyqtar praktıkada óz ómirsheńdigin dáleldedi dep  nyq senimmen aıtýǵa bolady», - dedi Qaırat Mámı.