Bıyl Jambyl oblysynda qurylys kólemi eki ese artady – Berdibek Saparbaev

TARAZ. QazAqparat – Jambyl oblysynyń ákimi Berdibek Saparbaev jumys saparymen Taraz qalasyndaǵy birqatar ónerkásip nysandaryn aralap, qyzmetimen tanysyp, kezdesip otyrǵan ózekti máselelerdi sheshý joldaryn saralady, dep habarlaıdy QazAqparat Jambyl oblysy ákimdiginiń resmı saıtyna silteme jasap.

Oblys ortalyǵyndaǵy iri azyq-túlik qoımalarynyń biri - «Taraz-Holod» JShS 2007 jyldan beri jumys isteýde. Onyń aýmaǵy 6 myń sharshy metrdi quraıdy. Onda júzdegen tonna un, kúrish, qaraqumyq, balyq, qus eti, makaron, kondıterlik ónimder jáne basqa da azyq-túlik taýarlary saqtalýda.

Kásiporyn dırektory Sáýle Janabekova oblys ákimine ónimderdi saqtaý sharttary men ony júzege asyrý joldary týraly aıtyp berdi. Onyń aıtýynsha, aıtarlyqtaı máseleler joq, degenmen karantın engizilýine baılanysty taýarlardy tasymaldaý boıynsha birqatar qıyndyqtar týyndap otyr.

B. Saparbaev bul máseleniń sheshilgendigin tilge tıek etip, tek oblystyq jedel shtabqa tıisti ótinim berý kerektigin, sol boıynsha kompanııanyń avtomashınalarynyń nómirleri qala men oblys aýmaǵynda qozǵalýyna ruqsat etilgen kólik quraldarynyń jalpy bazasyna engiziletinin jetkizdi.

«Zapchast» aktsıonerlik qoǵamynyń metallýrgııalyq zaýytynda temir jol kóligine arnalǵan tejegish qalyptaryn, qurylysqa arnalǵan armatýralar shyǵarylmaq. Alaıda, qazir ol toqtap tur. Zaýyt dırektory Ádilbek Qulbaevtyń aıtýynsha, tsehtardy iske qosý jumystaryn júrgizý qajet. Karantınge baılanysty ol keıinge qaldyrylýda eken. Bul turǵydaǵy másele mamandarǵa baılanysty bolyp otyr desek, oǵan Qytaıdan arnaıy mamandardy shaqyrý kózdelýde.

Oblys ákimi bul iske qol ushyn berýge daıyn ekendigin jetkizdi.

- Mamyr aıynan bastap bizde aýqymdy qurylys jumystary bastalady. Bul turǵyda sizder shyǵaratyn armatýra zaty qurylys nysandaryna asa qajettigin aıtpasaq ta túsinikti. Sol úshin zaýyttyń iske qosylýyn jedeldetý kerek, - dedi ol.

Qurylys materıaldary naryǵynda 20 jyldan beri jumys istep kele jatqan «Keramık ınvest» JShS negizinen temir-beton buıymdaryn shyǵarýmen aınalysady.

- Bizde shıkizatqa qatysty kedergiler joq. Tsement Myńaraldan, metall – Qaraǵandydan ákelinedi. Ónimderimizge óz óńirimizden bólek Túrkistan men Qyzylorda oblystarynan da suranys kóp, - dedi kásiporynnyń bas dırektory Evgenııa Lı.

Aımaq basshysy bıyl qurylys kólemi ótken jylmen salystyrǵanda eki esege artatynyn, sondyqtan da zaýyt ónimderi ásirese ishki naryqta qajet bolatynyn atap ótti. Sondyqtan qýattylyqty arttyrý, óndiristi keńeıtý úshin ınvestıtsııa tartý qajettigine nazar aýdartty.