Bıyl jalǵan mıkrokredıt berý azaıdy - Qarjy naryǵyn retteý agenttigi
«Sizderdiń saýaldaryńyzda sáıkes Agenttik 2020-2021 jyldary halyqqa mıkroqarjy uıymdary (MQU) bergen mıkrokredıtterge monıtorıng júrgizip, olar boıynsha alaıaqtyq belgileri anyqtaldy. QR Іshki ister mınıstrliginiń aqparaty boıynsha (22.05.2021 j. № 3-3-6-40/1-10322) 2020 jyly ınternet alaıaqtyqtyń 3000 oqıǵasy tirkelgen. Olar qarjy uıymdary men MQU-dan basqa, qarjy pıramıdalarynyń, halyqtan aqshany zańsyz ınvestıtsııalaýdyń jáne tartýdyń ártúrli nysandary bar uıymdardyń qatysýymen qosymsha zańsyz operatsııalardy qamtıdy», - delingen Qarjy naryǵyn retteý jáne damytý agenttigi tóraǵasynyń depýtattar saýalyna bergen jaýabynda.
Agenttiktiń derekterine qaraǵanda, 2020 jyly MQU-ǵa qatysty 77,9 mln teńge somaǵa jalǵan mıkrokredıtterdiń 956 jaǵdaıy anyqtaldy. Bul kórsetkish berilgen onlaın mıkrokredıtterdiń barlyq sanynyń 0,05 paıyzyn qurady. Sonymen qatar, byltyrǵy osyndaı kezeńimen salystyrǵanda bıylǵy 4 aıda jalǵan mıkrokredıtter berý oqıǵalary 3,6 ese tómendedi, ıaǵnı 10,6 mln teńge somadaǵy 94 jaǵdaıǵa deıin.
«Іshki ister mınıstrligi málimetteri boıynsha bul oqıǵadardyń 96 paıyzy qylmystyq sıpatta ekendigin atap ótemiz. Osy oraıda joǵalǵan, urlanǵan, jalǵan jeke basyn rastaıtyn qujattardy paıdalanýǵa, sondaı-aq qashyqtan mıkrokredıtter resimdeý kezinde qaryz alýshylardy ıdentıfıkatsııalaýdyń jeńildetilgen tásilin (kody bar tekserý SMS jiberý) paıdalanýǵa baılanysty bolyp otyr», - dep atalyp ótken M. Ábilqasymovanyń jaýabynda.
Aıta keteıik, Parlament Májilisiniń birqatar depýtattary onlaın nesıe berýdegi alaıaqtyq áreketterdiń kóbeıýine alańdaýshylyq bildirdi. Osyǵan baılanysty bir top depýtat QR Qarjy naryǵyn retteý jáne damytý agenttiginiń tóraǵasy Mádına Ábilqasymovaǵa saýal joldady.