Bıyl jabylǵan 9 banktiń salymshylary ótemaqyny qalaı alýyna bolady

NUR-SULTAN. QazAqparat – Jabylǵan bankterden ótemaqysyn ýaqytyly almaǵan salymshylar ótinish berý arqyly aqshasyn qaıtarýyna bolady. Bul oraıda Qazaqstannyń depozıtterge kepildik berý qory ótinish berý tásilderin túsindirdi, dep habarlaıdy QazAqparat tilshisi.

Bıyl Qazaqstanda 9 bank jabyldy. Olar - «Qazınvestbank» AQ, «Valıýt-Tranzıt Bank» AQ, «Delta Bank» AQ, «Qazaq Banki» AQ, «Eksımbank Qazaqstan» AQ, «Astana Banki» AQ, «Tengri Bank» AQ, «AsiaCredit Bank» AQ, «Capital Bank Kazakhstan» AQ.

Atalǵan bankterde depozıti bar salymshylarǵa kepildik ótemaqy tóleý merzimi aıaqtaldy. Qarajat azamattardyń zeınetaqy qoryna aýdaryldy.

Degenmen osy aralyqta qandaı da bir jaǵdaıǵa baılanysty ótemaqy ala almaı qalǵan azamattar da bar.

Qazaqstannyń depozıtterge kepildik berý qorynyń dereginshe, keshikken adamdar dáleldi sebepterin rastap, qazir de ótinish bere alady.

Dáleldi sebep boıynsha ótemaqyny taratylatyn bankterde jeke shoty bar adamdar nemese salymshylardyń muragerleri alýǵa quqyly.

Dáleldi sebep bolyp esepteletin jaǵdaılar:

- Áskerı qyzmetke ornalasý;

- Qazaqstan Respýblıkasynyń terrıtorııasyn tys jerde bolý;

- Salymshynyń murasyn qabyldaý jáne murany ıemdenýge nemese ashýǵa baılanysty ózge de sebepter;

- Bas bostandyǵynan aıyrý oryndarynda bolý;

- Sot anyqtaǵan ózge de mán-jaılar.

Osy atalǵan jaǵdaılar men sebepterdi qujat túrinde rastaıtyn resmı anyqtama bolsa, onda depozıtterge kepildik berý qoryna ótinish joldaýǵa bolady.

Ótinishtiń úlgisi QDKBQ saıtynda jarııalanǵan. Salymshy ony qaǵaz kúıinde shyǵaryp, dáleldemelerin engizip, atalǵan organǵa tapsyrýy tıis.

Depozıtterge kepildik berý qory ótinishti 5 jumys kúni ishinde qaraıdy. Ol osy ýaqyt ishinde kepildik ótemaqyny tóleýge tıis. Alaıda, qujattar sáıkes kelmegen jaǵdaıda ótinish keıin qaıtarylady. Qarajat salymshynyń ózi kórsetken bank shotyna aýdarylady.

Eger qandaı da bir sebepterge baılanysty ótinish maquldanbasa, onda salymshy qujattardy tekserip, ótinishti qaıta joldaı alady.