Bıyl «Zerdeli» yqshamaýdanyndaǵy 10 úıdiń irgetasy nyǵaıtylady
Qala ákimi Instagram paraqshasynda «Zerdeli» yqshamaýdanynyń turǵyndaryn tolǵandyrǵan másele nazardan tys qalmaǵanyn jazdy.
«QazQSǴZI mamandarynyń qorytyndysy boıynsha 2020 jyly 7 úıdiń irgetasy nyǵaıtyldy. Bıyl 10 úıdi nyǵaıtý josparlanyp otyr. Barlyq jumysty onyń tehnologııasy, qurylys normasy men talaptaryn saqtaı otyryp júrgizýdi tapsyrdym. Budan keıin 13 aýlanyń qasbeti retke keltirilip, balalarǵa arnalǵan oıyn men sport alańdary, oryndyqtar men jaryq júıesi ornatylady», - dep jazdy B. Saǵyntaev.
Qala ákiminiń sózinshe, turǵyndardyń ótinishimen aýla men úı mańyndaǵy aımaqty retke keltirý máselesi sheshimin tabatyn bolady.
«Zerdelide» turǵyn úılerge janasyp jatqan 8 jer telimi alynady.
«Sondaı-aq «Nurkent» yqshamaýdanynda № 43 pen №72 úıdiń arasyndaǵy jer telimine bıik úı turǵyzbaq bolǵan menshik ıesinen bul jer tárkilendi. Atalǵan jerde balabaqsha boı kóteredi», - dep atap ótti B. Saǵyntaev.
Ákim jumys sapary kezinde Alataý aýdanynda «Nurly jer» baǵdarlamasy aıasynda salynyp jatqan «Alataý sıtı» turǵyn úı kesheninde boldy.
Sondaı-aq shahar basshysy Túrksib aýdanyndaǵy «Qaırat» yqshamaýdanynda ornalasqan TK qurylys alańdaryn aralady.
Munda 1,5 myń oqýshyǵa arnalǵan mektep, 280 oryndy balabaqsha men 500 kelýshige arnalǵan emhana qurylysy qarastyrylǵan.
Keshendi qurylys jumystarynyń arqasynda turǵyndar qajetti áleýmettik nysandarmen qamtamasyz etiledi.
Biz buǵan deıin «Zerdeli» shaǵynaýdanynda ornalasqan barlyq kópqabatty 32 turǵyn úıge tekserý júrgizý úshin 312 mıllıon teńge baǵyttalǵanyn jazǵan bolatynbyz.
Eske salaıyq, 2019 jyly Alataý aýdanyndaǵy «Zerdeli» shaǵyn aýdanynyń turǵyndary úıleriniń qısaıǵanyn aıtyp, dabyl qaqqan bolatyn.
Keıin Baqytjan Saǵyntaev qısaıǵan úıdiń turǵyndarymen kezdesip, ákimdik olardy kóshirýge daıyn ekenin jetkizdi.