Bıyl ýtıl alymnan 690 mlrd teńge jınaý kózdelgen - mınıstr

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev Úkimet otyrysynan keıin BAQ ókilderiniń saýalyna bergen jaýabynda bıyl ýtıl alymnyń jalpy somasy 690 mlrd teńge bolatynyn málim etti, dep habarlaıdy QazAqparat tilshisi.

«Bul somanyń ishinde 12 mlrd teńge qatty turmystyq qaldyqtardy jınap, tasymaldaýǵa, qaıta óńdeýge jáne avtokompanııalarǵa ketedi. Qaıtalap aıtamyn, «Jasyl damý» AQ óziniń ınvestıtsııalyq saıasaty aıasynda jumys isteıdi. Qaıta óńdeýge baǵyttalǵan jobalar paıda boldy deıik, mundaı jaǵdaıda ınvestıtsııa saıasatyna ózgeris engize alady», - dedi vedomstv basshysy.

Mınıstrdiń aıtýyna qaraǵanda, bıyl ýtıl alymnyń kólemi 690 mlrd teńge bolady degen boljam bar.

Jýrnalıster mınıstrden halyq ishinde aıtylyp júrgen ýtıl alym týraly oıyn surady.

«Biz «Jasyl damýdyń» ınvestıtsııalyq saıasatyn tutastaı qaıta qaraýdy josparlaǵanbyz. Ondaı usynystardy qarastyrýǵa daıynbyz. Naqty usynystar bolsa, bir ústelde bas qosyp, áńgimelesýge daıynbyz. Ol usynystyń negizdemesi bolýy kerek qoı. Bizdiń óz argýmentterimiz de bar. Úkimet óz deńgeıinde sheshim qabyldady. Biz bul baǵytta jumys istep jatyrmyz. Naqty usynys bolsa qaraýǵa daıynbyz. Málimdemelerden bólek, naqty dáıekteme men negizdeme qajet», - dedi Serikqalı Brekeshev.

Aıta keteıik, osy aıdyń basynda ýtıl alymnyń jańa stavkasy jarııalandy.