Bıyl úshinshi gaz jylý stantsııasynyń qurylysyn bastaýdy josparlap otyrmyz – elorda ákimi
Bul týraly ol óziniń Facebook paraqshasynda jazdy, dep habarlaıdy QazAqparat.
«Qalanyń tirshiligi toqtaýsyz júrý úshin birqatar mańyzdy nysan salamyz. Olar – «Turan» jáne «Ońtústik-Shyǵys» gaz jylý stantsııalary, sondaı-aq qurylysy uzaqqa sozylǵan JEO-3 nysanyn aıaqtaımyz. QR Premer-mınıstri Álıhan Smaıylov ınfraqurylym nysandarynyń qurylys barysyn tekserdi.
Qalada jylytý maýsymy shamamen 7 aıǵa sozylady. Gaz jylý stantsııalary men JEO-3-ti aldaǵy jylytý maýsymynda kezeń-kezeńimen paıdalanýǵa berýdi josparlap otyrmyz»,-dedi elorda basshysy.
Onyń sózinshe, máselen gaz jylý stantsııalary men JEO-3 osy jylytý maýsymynda 1100 Gkal/saǵ jylý beredi, bul bizge profıtsıtke shyǵýǵa múmkindik beredi.
«Sonymen qatar bıyl úshinshi gaz jylý stantsııasynyń qurylysyn bastaýdy josparlap otyrmyz»,-dedi ákim.
Aıta keteıik, búgin Álıhan Smaıylov Astanadaǵy jańa gaz jylý stansalary jáne 3-JEO qurylysymen tanysty.